Opolisi yaNamibia oya pewa oohauto dhi li 164, ndhoka tadhi ka topolelwa iitopolwa ayihe 14 moshilongo. 

Kakukutu komatanga gopolisi Joseph Shikongo okwa ti oohauto ndhoka odha gandjwa okupitila momayambindhindho gepangelo, okuhwepopaleka iilonga yopolisi. 

“Ohauto ndhoka otadhi ka yambindhindha okuyamukula nokukandula po omaupyakadhi ga taalela opolisi, unene ngele tashi ya kiiyenditho, nuunene otaga ka yambidhidha pethimbo ndika lyomatango omanene,” ta popi ngaaka. Ethimbo lyomatango omanene iimbuluma ohayi indjipala onkene opolisi yaNamibia oyi li komalwilo okukandula po ayihe. 

Oshigwana nasho osha kala nokunyenyeta kutya olundji ngele tashi lopota omakemo gawo nenge uuna sha hala omakwatho gopolisi ohashi lombwela kutya kape na iiyenditho. 

Maria Shavuka gwomolukanda Evululuko mOshakati moonkundathana noshifokundaneki shika okwa ti onkundana otayi uvitha nawa, ashike oohauto nadhi longithwe ngaashi dha nuninwa. 

“Ohashi shololitha ngele tatu lopota iiningwanima ihe, otatu lombwelwa kape na oohauto, omanga kwa li tatu vulu okukwathelwa pethimbo,” ta popi ngaaka. 

Ta hokolola kutya oomwedhi ndatu dha piti, okwa li a kondokelwa megumbo, ihe sho oombudhi tadhi kondjitha okuteya okwa li a dhengele opolisi, ihe okwali a yamukulwa kutya kapena ohauto. -vkaapanda@nepc.com.na