Charles Ndeumane
Omudiakoni gwongeleka yaCatholic moNkurenkure moshitopolwa shaKavango West okwa yaha nokudhipaga omwanamati gwomimvo 31 omanga iniigandja kopolisi.
Shi ikolelela kolopota yopolisi omunamimvo 68 ngoka eli omudiakoni gwongeleka yaCatholic moNkurenkuru okwa tulwa miipandeko sho yaha omwanamati Alex Mushongo omutenya gwOsoondaha lwiikando iyali – lumwe mekothi, nalumwe mokugulu kokolulyo nokwa si pethimbo mpoka. Anuwa oshiningwanima shoka osha ningilwa megumbo moka hamu zi omufekelwa nanakusa momukunda Siudiva moNkurenkuru.
Inspector gwopolisi omukuluntu moshitopolwa shaKavango West Raimbert Muronga okwa ti ota ku fekelwa kutya oshiningwanima shoka osha etwa koontamana ndhoka dha tukuka megumbo, ashike uuyelele owundji otawu ka hololwa ngele omakonakono gomuule ga ningwa.
“Omufekelwa ina holoka natango mompangu onkene uuyelele mboka twa gandja molopota owo ashike wulipo manga, ashike omakonakono gomuule ogeli metifa nuuyelele awuhe otawu ka zamo ngele omakonakono gapu,” Muronga ta ti.
Oshiningwanima shika oshe ya konima ashike yomwedhi sho natango omusita gwaCatholic omunamimvo 31 Max Hambabi omukalimo gwomoshitopolwa shaHangwena a kwatwapo moshipotha shedhipago sho a dhipaga aatekulu yaali muAguste nuumvo.
Anuwa Hambabi okwa dhipaga okatekulu koomvula ndatu sho eka dhenge omutse posamende nokasi pethimbo mpoka.
Hambabi natango okwa dhenge ishewe okatekulu okakwawo komimvo hamano omutse posamende nokuka ehameka noonkondo, oka falwa mbala koshipangelo ashike nako oka kasa molwa iilalo mbyoka yali yaya muule.
Oshiningwanima shoka oshali sha ningilwa momukunda Onakaolo moshikandjohogololo shaNgela moshitopolwa shaHangwe muAguste nuumvo. Hambabi okuli mondjedhililo.