Opolifi moshitukulwa shaHangwena otai konakona oshibofa shomukulupe weedula 62 vati a yasha mushiinda shaye nondjebo mepepe. 

Omufekelwa okwa kwatwa po efiku tuu olo a longa oshimbuluma. Oshiningwanima osha ningwa mexuliloshivike komukunda Onambaba moshi tukulwa shaHangwena efimbo loufiku. Omupopiliko wopolifi moshitukulwa shaHangwena Warrant Simeon Haufiku okwa koleka oshiningwanima eshi. 

Opolifi oya hokolola tai ti nakuninga oshihakanwa okwa hangika e li keumbo laye nomukulukadi womufekelwa. 

Otaku hokololwa kutya omufekelwa a lombwelwa omahokololo kutya omukulukadi waye vati oku li mekwatafano lopaihole nanakuninga oshihakanwa. 

Opolifi oya hokolola tai ti efiku tuu olo lwopotundi 21h00 omufekelwa okwa ya keumbo lanakumonifwa oshiponga ndele ta hange ve li nomukulukadi waye. 

Vati okwa kufa ondjebo ndele ta yashe mukwao mepepe nokumona oshiponga. 

Opolifi oya yelifa tai ti fiyo opapa kape na ouyelele ngeenge oshoshili kutya omukainhu womufekelwa oku li mekwatafano lopaihole nanakuninga oshihakanwa. 

Natango, opolifi oya hokolola tai ti omufekelwa ou ina va hombola nomukainhu waye ashike ohava di meumbo limwe. 

Nakuninga oshihakanwa okwa li a twalwa koshipangelo opo a ka mone epango lopaunamiti. 

Omukulupe ota pangulilwa oshibofa shonghendabala yedipawo. 

Natango konima yeemwedi mbali, moshitukulwa shaHangwena omwa lopotwa omulumenhu umwe kwa li a monifwa oshiponga nekatana komulumenhu mukwao konima eshi a hanga e li nomukainhu waye monduda. 

Oveleli vopamifyuululwakalo ova ti osha nyika oshiponga ngeenge omukainhu e li mekwatafano lopaihole novalumenhu ve dulife puumwe molwaashi otashi dulu okweeta oshiponga nomadipawo. 

-fhamalwa@nepc.com.na