Omuloka gwa nyanyudha, yamwe ya thita po

Omuloka gwa nyanyudha, yamwe ya thita po

OMULIMBAALIMBA – Nonando aakalimo yokoonoli yamwe taya pandula omvula sho ya ningi esiku tayi loko nawa yamwe oye na iilya yili kohi yomeya sho Shiyenga shaNangombe a ningi esiku te ga tilehi nawa okuza oshiwike sha zi ko sigo omehuliloshiwike.

Oomeme yamwe ya li taya longo mepya Etitano momukunda Omulimbaalimba moshitopolwa shaMusati oya ti omuloka ngaashi gonuumvo oye gu etha nale, taya ti omvula ndjika otaya li iilya.

“Iilya yimwe mepya lyandje oyi li momeya, oshoka omvula oya kala nokuloka yaa na luthuwo, ihe ombinga yimwe iilya oya talalelwa nawa,” ta pandula.

Saima Reinhord ngoka a li ta longo epya lye okwa ti, oya ningi oomvula taya mono omuloka inaagu gwana, ihe gonuumvo ogu ulike kutya kaku na ondjala.

“Kehe ngoka ta ka itula mo miilonga yomomapya ota ka likola shoka a longo,” ta ti ngaaka.

Matias Timoteus gwomomukunda Otamanzi okwa ti, omvula oya ningi oshiwike tayi loko nawa niishana oyu udha, omeya oga ningi ogendji.

“Ondi wete kutya efundja olyi li mondjila, oshoka omvula oya ningi omasiku ogendji tayi loko. Omeya mpoka kwa li twe ga thigi hapo we ge li nena, nonando okwa li ya tsikile okuloka okupendukila ohela,” Timoteus a popi ngaaka.

Ta ti, otwa kala nokugalikana omvula yi loke, Pamba okwa yamukula omagalikano gawo.

Timoteus okwa ti iilya yawo otayi monika nawa noya paluka nawa.

Sha ikwatelela konkalo yombepo, omvula onene oya tengenekwa tayi tsikile okuloka miitopolwa yomonooli momasiku ga taalelwa.

Omanga aanamapya taya ligola nokupandula omuloka omwaanawa aakalimo yomoondoolopa oya limbililwa sho omeya taga ende taga ningi ogendji omanga yamwe ye li momeya.

Lamek Martin ngoka ha landitha uukwashikependjewo momapandaanda kOtaupi okwa ti, ota ningi esiku itaa shingitha oshoka ondoolopa oyi li kohi yomeya.

“Kandi na mpoka tandi landithile manga, omahala ogu udha omeya nonando ongaaka ota tu pandula omuloka omwaanawa,” ta popi ngaaka.

Selma Shikongo mOshakati, kEhenye okwa ti, omagumbo gawo oga ndhingolokwa komeya, gomvula.

“Elelo lyondoolopa nali tu tale, nali tutile omahala ngoka ge na omeya omavi,” ta nyenyeta ngaaka.

Titus Shivute okwa ti elelo lyondoolopa lyOshakati olya ndopa okugwanitha po iilonga yawo.

“Shika oshinima shakehe omvula, kashi shi oshinima oshipe. Omagumbo ngaashi ngoka ge li mEhenye oga kala nuupyakandhi womeya okuza ethimbo ga tungwa po,” ta popi ngaaka.

Ta ti, sigo opayife aakalimo otaya lili taya si omeya, nonando otaya iyithana ye li nondoolopa.

Sheetekela Iyambo gwomolukanda Evululuko okwa ti, ombashu ye oyi li kohi yomeya.

“Kandi nkene, otandi yi peni ngele onda yi ndi ka ze kookuume kandje, iinima yandje otandi adha ya yakwa mo koombudhi. Kandi na oshimaliwa sha gwana okututila pehala lyandje omavi, opo omeya kaage ye po we,” ta ti ngaaka.

Ta gwedha po ta ti, omeya ngoka ogomvula ashike, nena efundja ndyoka tali popiwa lya fa tali endele ko olya thiki, itatu si ngaa omeya nani? Ta pula ngaaka.

Iyambo okwa ti, osikopa ye yiikutu oya nyanyuka po thiluthilu komeya, omanga iinima yimwe e yi londeka kiipakete yoombiila opo kaayi nyenge omeya.

Omugandji gomauyelele melelo lyondoolopa lyaShakati Katarina Kamari okwa ti elelo lyondoolopa okwa li lye ya po nomukanka gokweenda omeya opo kaaga taandele okuya momagumbo gaantu, mo2021.

“Omukanka ngoka okwa li gwa kwathele nonando inagu kandula po uupyakadhi awuhe, opo omeya ga landule omukanka ngoka ga ye miishana ya kwatathana noontopa,” ta ti ngaaka.

Kamari okwa ti ota galukile Kundana kombinga yaakalimo ye li komalukanda ge na omeya, konima a mono uuyelele.

Omvula oya li ya loko unene okuza oshiwike sha zi ko notayi tsikile natango okuloka.

Iishana oya udha omeya niimuna oya paluka nawa komalutu sho tayi li omwiidhi gwa talala nawa.

vkaapanda@nepc.com.na