Mangestrata Davy Kambinda, okwa tindile omulumentu gwomimvo 44 gwedhina Steven Naruseb, ngoka ta tamanekelwa edhipago lyakuume ke komiihole Rachel Simasiku gwomimvo 33, eyifutilemo mondjedhililo. Oshipotha shaNaruseb osha undulilwa komasiku 22 gaApilili omumvo tagu ya, okugandja ompito yomakonakono.

Naruseb okwa lombwele ompangu kutya ota kongo hahende e mu kalele po. 

Omweeti gwiihokolola Cedrick Mundia okwa indile ompangu opo omutamanekwa ngoka kaa pewe ompito yeyifutilemo omolwuunene woshipotha shoka nuutile kutya ota vulu okuya omakonakono moshipala. 

Otaku hokololwa kutya Simasiku okwa tsuwa sigo omeso komuholike gwe, sha ningilwa koChotto mondoolopa yaKatima Mulilo moshitopolwa shaZambezi uusiku wOsoondaha.

Nonando Simasiku a li a falwa koshipangelo shaKatima Mulilo, konima sho a tsuwa lwiikando yontumba momutse nomoshipala, okwa ka hulitha kuuwehame. 

Otaku hokololwa kutya nakusa okwa li a uvika kaashiinda ta kugu ta pula ekwatho, mboka ya li ya kambadhala oku mu kwathela ashike oya li ya adha egumbo lya patwa. 

Sho ya talele mekende, oya mono omufekelwa e na ombele, e ta dhimi oolamba dhomondunda sho a mono kutya opu na aantu ye li pondje. Sho anuwa omukiintu a hulitha oku kuga, omufekelwa okwa zi mo megumbo e ta lombwele aashiinda ya dhengele opolisi oshoka okwa mana shoka a li ta longo nokwa zi po a humbata oongaku dhe. 

Aashinda oya dhengele opolisi, nomukiintu okwa adhika mekungu lyombinzi itaa fudha, nokwa falwa koshipangelo, mpoka a tseyithwa kutya okwa hulitha kondohotola. Natango okwa lopotwa omukiintu gwomimvo 40 a tsuwa nokusa kukuume ke komiihole gwomimvo 50, komeho gayina naanona. Sha ikwatelela kopolisi moshitopolwa shaShana oshiningwanima shoka osha holoka Omaandaha komukunda Okaku. Nakusa okwa tseyika nedhina Katrina Amakali. 

Omulumentu ngoka okwa mangwa po.

-vkaapanda@nepc.com.na