Auleria Wakudumo 

Omukulunhuwiliki woNamibia Training Authority (NTA) Erick Nenghwanya okwa holola kutya omwaalu wovakainhu oo uli pombada koiputudilo yopaungoba hano keeTechnical and Vocational Education and Training (TVET). 

“Neudo oiputudilo oya shangifa omwaalu wovakainhu veli 13 512 ovo va kalela po eepelesenda 55 domwaalu wovalihongi neudo,” Nenghwanya ta holola ngaho. 

Nenghwanya okwa holola yo kutya omwaalu ou owa teelelwa u kale wa lunduluka shaashi natango oiputudilo 71 otai twikile nokuninga omalishangifo oshilongo ashishe. 

Ouministeli wehongo, oungoba, ovanyasha nomaudano melongelo kumwe noNamibia Training Authority owa tula moilonga okaliindeli koTVET 2026 sha ningilwa moWindhoek. 

Omupedu minista wehongo, oungoba, ovanyasha nomaudano Dino Ballotti okwa holola kutya eymbule po nexumokomesho laNamibia otali lalakanenwa ashike ngeenge oshilongo osha kala shina ovanhu vena owino yopaungoba oyo tava dulu okulongifa opo va nduluke po oinima yonhumba. 

Ballotti okwa ti epangelo onghene tali twikile okunghonopaleka oshikondo shoiputudilo yopaungoba okupitila momukalo yokuyandja oshimaliwa nokufitila ovalihongi ofikola. 

Okwa ti eshi otashi holola kutya epangelo otali twikile noleli tula mo okukwafela ovanyasha. 

-awakudumo@nepc.com.na