Minista wouhaku, Dr Esperance Luvindao okwa ti ouministeli owa didilika omukifi wopolio, oo wa monika momafiku a 2 Apilili 2026 okudilila momeva ohanya, nonande inau lihanena oshilongo ashishe natango.
Luvindao okwa ti nonande oshilongo ashishe sha tunhilwa eemwedi da dja ko molwomukifi ou, ouministeli owa kala we lipyakidila nokuninga omakonakono moinima ya yooloka, omo mwa kwatelwa omeva omomalambo ohanya.
Omakanakono okwa kala nokuningilwa keshe onhele ile oshinima tashi dulu okukala osheetifi shomukifi wopolio.
“Omadidiliko eshi a dja kolabola okwa yelifa kutya, oshitandavelifi shakula shomukifi wopolio omeva omomalambo ohanya nokwa didilikwa moitukulwa ya yooloka,” ta yelifa.
Okwa twikila kutya fiyo opapa kape na nande omukwashiwana a lopotwa a kwatwa komukifi ou okudilila momeva ohanya, ashike konima omakonaakono a li a ningilwa omalambo ohanya moRundu mo 2025, okwa ulika kutya omukifi omo u li momeva, nou li mo u na omwenyo osho yo eenghono.
“Eshi twa mona kutya Rundu oku na omeva e lihanena omukifi, ovanambelewa ova twikila nokuninga omapekapeko avo komalambo ohanya moWindhoek osho yo moGobabis, ndele nao okwa yandja oidjemo tai ulike e na omukifi wopolio,” ta ti.
Minista okwa ti eshi otashi ulike kutya omukifi ou li mokati ketu natango, notau pula ashike komesho.
Omolwoshiningwanima eshi, ouministeli natango owa pangela ompangela opo u ninge oshikonga shomatunhilo opolio okudja peedula omu-10 wa finda pedu nokwa teelelika a ka tameke mo 20 fiyo 23 Apilili 2026.
“Okukelela okudule okupanga. Ounona vahapu ngaashi ava hava di momulukanda kave na omakanghameno kuvo vene,” minista ta yelifa.
Okwa ti vahapu ohava dana popepi nomeva ohanya, osho sha nika oshiponga shaashi osho tashi tandavelifa omukifi woludi eli.
Minista okwa yandja elondwelo moshiwana, osho yo kovadali opo va kale va pashukila ounona vaha dane popepi nomeva ohanya ile ondova, unene aa haa kala a kangavala momalukanda opo va dule okuxupa komukifi ou.