OKANGHUDI – Omupresidente mutivali waNamibia Hifikepunye Pohamba okwa ti ina mona nale omuleli muwa a fa Sam Nujoma shaashi okwa li omulumenhu ou e hole Ovanamibia aveshe.
Edi Pohamba okwe di popya onghela pefimbo Kundana a talela po eumbo laye komukunda wavo Okanghudi moshitukulwa shaHangwena. Nujoma okwa xulifa mepupi lomido 95, Olomakaya moshipangelo shopaumwene koWindhoek.
Pohamba okwa ta ti ina kukuma pefimbo a hangika konghundana yefyo laNujoma.
Okwa ti okwa dengelwa ongodi efimbo loufiku kukakukutu komatanga opolifi Inspector General Joseph Shikongo ndele te mu lombwelwe kutya Nujoma okwa xulifa
“Omwedi wa dja ko okwa li nda tatelela po Nujoma koshipangelo ashike inandi popya naye shaashi onda hanga e li monghalo idjuu,” Pohamba ta ti.
Okwa ti koshipangelo okwa dja ko ehe na mbili shaashi okwa hanga kaume kaye e li monghalo idjuu.
“Oku dja kw ang e koshipangelo onda kala nda teelela onghundana ii shaashi onghalo yaNujoma kakwa li iwa,” ta ti.
Pohamba okwa ti ova kala ve na oukaume nekwatafano liwa naNujoma okudja omudo 1960. “Onda kanifa kaume kange koshili. Omukondjelimanguluko mukwetu ou twa longa naye efimbo lile,” ta ti.
Okwa ti Nujoma omuleli ou kwa li a fimaneka ehongo molwaashi okwa fiya po oiputudilo ihapu moshilongo.
“ Okwatuma ovakondjelimanguluko vahapu kofikola pefimbo loita mwa kwatelwa Hidipo Hamutenya,” ta ti.
Pohamba okwa ti alushe ngeenge va shakena naNujoma oha popi omahokololo kombinga pefimbo va kala moita.
“Ohatu popipo kombinga yovaleli vomuAfrica ngaashi Nelson Mandela naKenneth Kaunda nosho tuu ovaleli vamwepo,” ta ti.
Pohamba okwa ti okwa pandula molwaashi inava nwa nale omalodu naNujoma alushe ngeenge va shakena.
“Otwa kala ashike hatu li oikulya yOshiwambo nosho yo omalodu oilya,” ta hokolola.
Pohamba okwa tanga Nujoma ta ti okwa kondja fiyo ta hange efindano laye okudja pefimbo loita.
Okwa ti Nujoma oye umwe a kala noku mu yambidida opo a ninge Omupresidente omudo 2005.
Okwa kumaida oilyo yongudu yoSwapo i kale nombili noukumwe.
Omunyekadi omutivali Penexupifo Pohamba okwa popya ta ti okwa pandula oilonga ya longwa kuNujoma.
-fhamalwa@nepc.com.na