Auleria Wakudumo 

Ngoloneya woshitukulwa shaShana Hofni Iipinge okwa indila ookansela vape opo va longe noudiinini nonelitulemo moilonga yavo oyo va taalela.

Ngoloneya eshi okwe shi holola pefimbo ta lekele mayola wodoolopa yaNgwediva Taarah Shalyefu Etinhe mOngwediva. 

“Ohandi indile ookansela aveshe vape opo va twikile opo pa fiwa kwaavo va dja koipundi. Tava twikile nokuyakula oshiwana nokutula eemhumbwe dasho komesho yoinima aishe opo tu shiive okuxwepopaleka eenghalamwenyo nokukala kovakwashiwana mOshana,” Ngoloneya ta holola ngaho. 

Iipinge okwa holola yo olupandu kookansela ava va dja moipundi. Okwa ti elitulemo moilonga yavo ola eta elunduluko meenghalo dovakwashiwana. 

Ookansela vakulu ova dana onghandangala mokuxwaxwameka nokuyambula po eeproyeka doikulya, exumokomesho moshiwana nokukwashilipaleka kutya eemhumbwe dovakwashiwana oda wanifwa po. 

Omukulunhuwiliki welelo lodoolopa yaNgwediva Rebekka Hidulikwa okwa holola olupandu moilonga yookansela va dja koipundi. 

Okwa ti ookansela ova kala nokulonga noudiinini momukokomoko wefimbo olo va li koshipundi. 

Omanga hatu tange ovo va li koshipundi, omesho amwe okwa tala yo kwaavo va uka meembelewa paife. 

Eshi oshe tu pa omhito iwa okudimbuluka osho sha ningwa kuvakwetu ovo tava fiye po ombelewa, oilonga aishe iwa va longela Ongwediva noshitukulwa. Mokudimbulukwa osho sha ningwa nale, otashi tu pe yoo osho tu na okuninga, hatu twikile opo va xuulila opo tu yambule po Ongwediva,” Hidulikwa ta ti ngaho. 

-wakudumoauleria@gmail.com