EPUPA – Aahimba yomomukunda Okozongombe moshikandjohogololo Epupa moshitopolwa shaKunene otaya nyenyeta ihaaya pewa iikulya yoshikukuta yo kaye na omeya, onkalo ndjoka anuwa ye ya dhigupalela.
Aakalimo oya ti oya ningi ethimbo inaaya mona iikulya yoshikukuta, noyu uvu taku popiwa kutya itaya pewa we oshikukuta oshoka yo Aakwaswapo. Omukalimo gumwe Mambwalu Tjome okwa ti, otaya si ondjala oshoka inaya mona mo sha momapya,
“Omvula inayi loka ngaashi twa li twa tegelela, shi ndi li ngeyika onda longulula epya lyandje iikando yi li ine, oshoka oya kala tayi lika po wo koombuku,” ta ti ngaaka.
Ta pula kutya ngele yo Aakwaswapo, itaya vulu okupewa iikulya yepangelo, oshike ye na okuthindilwa kongudhi opo yapewa iikulya yoshikukuta. Mambwalu okwa ti, onkalo yawo kayi shi kuyelekwa nomihoko dhilwe.
Micheal Kapuka ngoka a li a adhika ta litha iikombo ye okwa ti omeya ngoka haya nu ogo ngaa ngoka haga nuwa kiimuna, shoka sha nika oshiponga. “Omeya gokopomba katu ga shi, otwa ikolelela ashike momeya gomomulonga, moka mu na oongandu osho wo iilikama iikwawo,” ta ti ngaaka.
Kapuka okwa ti oya hala epangelo lyi kale tali ya yambidhidha noompumbwe ngaashi iitopolwa ikwawo. Mbamuna Mbeha okwa ti oya taalela wo natango uupyakadhi wuhaku, oshoka kape na okapangelo ke li popi, ohaya yi koRuacana kOshifo.
“Omayakulo gamwe ngoka oga li ge na okukala kehe momudhingoloko, ihe tse otwa pitililwa po kiinima ayihe mbyoka, ohatu lala tatu lika koomwe, kape na mpoka tatu vulu okumona oonete dhoomwe,” ta nyenyata ngaaka. Mbeha okwa ti natango momudhingoloko gwawo kamu na omayakulo gopapangelo ga gwedhwa po. Ta ti, mboka inaaya adha okukwata openzela, ohaya hupile ashike maatalelipo mboka haya gandja okathilinga uuna ya thanekwa nayo, nenge yeya enditha mo momudhingoloko.
Kansela gwoshikandjohogololo Epupa Daniel Kuuoko okwa ti shoka tashi popiwa kutya aakalimo Aakwaswapo itaya pewa oshikukuta, kadhi shi dhoshili.“Oshikukuta osha nuninwa oshigwana ashihe, mboka yi inyolitha oshikukuta ohaya pewa ashike, ihe ihaku talika kutya oya za kongundu yinipo,” ta popi ngaaka.
Ta ti, uupyakadhi mboka owu li po iiyenditho yokutopola oshikukuta, onkene ohashi thiki pwa pita ethimbo. Ta gwedha po kutya oshikukuta shoka shokomwedhi hashi gandjwa kaakalimo ya taalela ondjala, ita vulu okutya ko sha oshoka shoka oshi li kohi yOmupevipresidente, ihaye shi mono.
-vkaapanda@nepc.com.na