Minista mukulu woyeendifo noilonga, nakufya Erkki Nghimtina ota ka pewa efudiko lefimaneko lopakwaita komaendo omapendafule mEenhana, oo a shivika nawa ongEenhana Shrine. 

Edi oda kolekwa kungoloneya woshitukulwa shaHangwena Kadiva Hamutumwa. Ngoloneya okwa ti efudiko lefimaneko lopakwaita laNghimtina, otali ka kwatelwa komesho ketanga leameno laNamibia. 

Umwe womovakwanedimo Ndaenda Nghimtina-Kashuupulwa okwa yelifa kutya, exupulifo otali ka ningilwa peumbo laye pEdundja moshitukulwa shaHangwena. 

“Otwa mona yo ouyelele oo wa yelifa kutya ombelelwa yomupresidente woshilongo otai ka kala ya kalelwa po, osho yo oilyo yakula okudilila keeministeli da yooloka nayo oya teelelika i kale ya holoka,” ta ti. 

Nghimtina oo a li epandufule mekondjelomanguloko loshilongo, okwaxulifila peumbo laye pEdundja mo8 Febuluali 2026. 

Ye vene okwa yambukile momukunda Eembidi , moshitopolwa shaHangwena. 

Nghimtina okwa longela epangelo laNamibia ongaminista miikako i li ine, okudja momudo 1997 fiyo 2020 nokwa longa ongaminista wetanga leameno, eemina niikwanghono osho yo iilonga noyeendifo. 

Natango okwa dana yo onghandangala yakula mekondjelomanguluko loshilongo, ongaumwe wo mo va kwateli komesho vongudu yoSwapo mo1979 osho yo omukulunhu womauyelele metanga lokakulumbwati loPeople’s Liberation Army of Namibia (PLAN). 

Nghimtina okwa li oshilyo shomutumba wopashiwana okudja mo1995 fiyo 2020, noilonga yaye oya dimbulukiwa kuvahapu shaashi oya li hai limonikila. 

Ovapambele vaye ova hokolola kutya ova kanifa ongudi yepata, omulumenhu omunambili noku na oukumwe. 

Nghimtina okwa xulifa mepupi leedula 78. 

-taimihaihambo2000@gmail.com