OSHAKATI – Oproyeka yedhina Twayambekwa Green Scheme, ndyoka ya li ya totelwa po owina aanuulema moshitopolwa shaShana oya yambuka po ishewe sho ya kala ya mwena po omolwomaupyakadhi ga yooloka. 

Ngoloneya gwoshitopolwa shaShana Hofni Iipinge okwa ti okwa kongo omakwatho okuza komahangano ga yooloka opo a yambidhidhe oproyeka ndjoka yi yumuke, sho ya kala ya mwena po. 

“Onda yamukulwa kehangano lyo-ALV Consulting Engineers, lya yambidhidha noshimaliwa N$37 000 opo aanuulema mbaka ya tsikile noproyeka yawo,” ta popi ngaaka. Ngoloneya okwa ti, opropyeka ndjoka otayi kala miimpungu itatu, oshikunino shiikwamboga niikulya, ikwamawawa osho wo iingulu. 

Okwa fatulula kutya oshimalwa shoka sha gandjwa ota shi ka landa iilongithomwa tayi pumbiwa opo oproyeka yi yambuke po. 

“Onda popya nale nelelo lyondoolopa yaShakati opo lyi patulule omeya ngoka ga ningi ethimbo ga pata. 

Natango otandi ka popya nakansela gwoshikandjohogololo Oshakati West, opo ya gandje embakumbaku lyi ya pululile oshali,” ngoloneya ta ti ngaaka. 

Ta gwedha po kutya ota tsikile okukonga omakwatho sigo oproyeka ndjoka ya yambuka po ngaashi e yi nuninina, oshoka elalakano okwiindjipaleka oproyeka ngaashi ndjika dhi ninge ndatu moshitopolwa. 

Omukalelelipo gwehangano lyo-ALV Consulting Engineers Jeremia Amutenya okwa ti oya yambindhindha ngaaka ongoshinakugwanithwa shawo okukwathela oshigwana. 

“Otwa li tu uvu omakemo gangoloneya, notwa mono etompelo lyongushu opo tu yambidhidhe ngaaka,” Amutenya ta ti. 

Omunashipundi gwehangano lyaantu taya lumbu nuulema konooli Julian Samuel okwa ti enyanyu ye na o li vule lyambishi e li megumbo mwa tselwa. 

“Otse aanelago oshoka otse yotango tatu yambidhidhwa ngeyi moshitopolwa shaShana opo tu tsikile okulonga oproyeka yetu,” ta pandula ngaaka. 

Samuel okwa kwashilipaleke kutya otaya ka kaleka po oproyeka yawo, sho taye ke yi sila oshimpwiyu nokulonga noonkondo opo yi hume komeho. 

-vkaapanda@nepc.com.na