Auleria Wakudumo 

Opolifi moshitukulwa shaMusati oye li twa moshibofa omo okaana kodula imwe vati ka xulifila moshipangelo konima yomafiku ahamano okudja eshi ke li kokela mediko lomundilo noku mona oshiponga neenghono. 

Nonande oshiningwanima eshi sha ningwa muApilili, opolifi oya holola kutya kakwali ya shivifilwa, oyeli twa ashike mouyelele ou pefimbo okokila yaShakat yali tai ningi omapulapulo kombinga yefyo lokaana oko. 

Otaku hokololwa oshiningwanima eshi sha ningwa momukunda Okatenenge mOnesi ashike ovakwanedimo inava shiivifila opolifi. 

Nakufya okwa tongololwa oye Ndeshipanda Niilenge.

Otaku hokololwa vati Niilenge ali a fiwa meumbo navakwao veedula nhee oshoyo 10 omanga ina aya poundingosho vopopepi navo.

“Ina eshi a aluka okwa hanga okaana keli natango momundilo ka pya shi nyanyalifa,” opolifi tai holola. 

Okaana okwa li ka twalwa koshipangelo kOnesi ndele taka tuminwa vali koshipangelo shaTsandi noka ka tuminwa koshipangelo shakula shaShakati opo ka ka mone epango lopaunamiti la wedwa po oko ka xulifila. 

Moshiningwanima shayooloka kwaasho, omukulupe weedula 63 okwa xulifa vati a hangwa mondobe yomeva. 

Oshiningwanima eshi osha ningilwa popepi noundingosho hava ifanwa Iimpenyu mOniipa, Etivali lwopo 13h30 lwaapo.

Nakufya okwa tongololwa oye Kristofina Ananias, omukalimo womOndando mOniipa. 

Omupopiliko wopolifi moshitukulwa shaShikoto, Chief Inspector Ellen Nehale- Kangulu okwa koleka oshiningwanima eshi. 

Otaku hokololwa omukulupe eli tuwa a kaama kombada yomeva kovaneumbo laye eshi a kana oule womafiku avali. 

-wakudumoauleria@gmail.com