HENTIESBAY-Ndango zegendeso doropa zaHenties Bay kuna lituramo melikwamo lyokugavera evhu kovantu vawo omu nye vana kugava konyara 600 square meter eli vawapayika nare omu vana kupura yimaliwa yokusika ko N$1 600 kovatungimo vakara asi awo kugwana nonzambi dononunu. Egano eli kwawizapo morwa vantu wovanzi kuna hara mambo gomawa ago hena gahepa kukara modoropa. Elikwamo eli kuna kara asi vantu vana kugwana evhu eli vahepa kuvatarurura momunene, yipo asi mambo aga yousili gahepa kugagwana woowo vana gatambesere. Ndango kazigeve magano gazo gangesi kwaMinistera gonodoropa nekuliko nomukunda Sankwasa James Sankwasa apa kakadingwire doropa zina moutano unapuko.
Opo nye kavakere nosigongi monad omo ure wononyuku, ministera kakadingwire hena noprojeka dekuliko modoropa, muna kara nye asi dimwe dazo mambo ntani kuwapukurura evhu olyo vayatungepo vantu. Munasipundi gokomitiye zegendeso Michael Skinni katente asi doropa kuna kara nekuliko lina kugenderera unene. Vantu kuna kutunda komavango gopo pepi vawize modoropa ngwendi Spitskoppe, Tubusis, Uis ntani Okombahe. Ndango zodoropa kuna kluruganesa yimaliwa yawo mokuwapukurura evhu.
‘’ Ose tuna yidimburura asi twahepa kuyirugana pangenderera omu natuvatera vantu vetu avagwana nonzambi dononsesu. Yiyo nye yatuninkisa asi tutulisepo elikwamo lyangesi lyokugavera evhu, kuna kara kevengo lyokuninka nodopi omu vakuta vadinkantu nomurongo ntatu’’, yimo ana kutanta Skinni.
Age katentenye asi evango eli lyo ext. 7, mavango nare vagagavera. Ano ko ext. 8,9 ntani 10 yigo nye mavango gana kukwamako. ‘’Mavango nagenye aga nare vagawapukurura yipo asi gana wapa kutungapo vantu, mema pogeli, nomulihu dokupita memagomadona podili ntani rutjeno. Ntani ose kuna kugava nodopi domawokowoko, edi vana kuforoma papa, moHent i e s B ay, vana kurugana vadinkantu vetu vana pili yirugana,’’ yimo ana kutanta. Mokugapakerera kuna kara mavango gokutunga gana siki ko 600 aga nye tuna kuwapayika ngesi vagaruganese melikwamo lyekuliko. Nampili ngoso doropa simpe kuna kara noudigu womambo omu vana kugangungunyikira gahepa kusika ko 3 600 mambo ngoso. Elikwamo limwe vana kurugana lyenene kuna kara ko ext. 12 oku nye kuna kara N$44 zonomiliyuna eli vakurugana vene vakansela omu vana kuyirugana mokureta uwa kovantu unene vava nye vaza mepwizumuko nava vakaramo nare. Mokuyimana nayinye eyi kuna kara nye mwaAugust ndi September. Mokugwedako, Erongo Red nage kwapungwisamo yimaliwa yokusika ko N$12 yonomiliyuna vagave rutjeno komambo gokusika ko 188 aga nye gakere asi nawo vamwe vagwen mambo. Eyi tuna kumona ngesni asi evango lina kara asi nalyo lyodoropa. ‘’ Eyi kapi yina kara asi evhu tupu, elituromo, nokukara nomagano gokomeho mokugusapo udigu womambo,’’ yimo ana kutanta Skinni. ‘’ Omu tuna kugava noplots koyimaliwa yokusika ko N$1 600 eyi nopira muntu kugwana nkenye oku noza mosirongo setu. Sankwasa ogu kadingwire mavango vanatambesere kekuliko, kapandwire ndango kweyi varugana. ‘’ Ame nina hafa kweyi ninamono. Evhu nare valiwapayika, mavango gakere asi kapisi gokutunga nare vagatura gakare gokutunga ano mambo gekuma ngesi vana gadike vagusepo nye yimbashu. Ndango zodoropa kuna kugava hena nodopi domawokowoko. Ame kuna kuharera erago nodoropa dimwe dahepa kugusapo sihonena saHenties Bay,’’ yimo ana kutanta.