ONGWEDIVA – Ovanhu va dja mepata leehamba doshitunda shUukwambi ova holola elimbililo molwa edjuupalo leenghendabala odo vati va ninga efimbo nefimbo tava pula opo va ye momutumba nelelo lUukwambi opo va kundafane kombinga yoshinima shoku alula ouhamba mUukwambi.
Omunashipundi wOkomitiye kAakwaniilwa yUukwambi Willem Amwaama okwa ti ova hala ouhamba u kale wa alukila moshitunda shUukwambi ngaashi naana kwa li sha kala fiyo omudo 1932 eshi Omukwaniilwa Iipumbu a xulifa.
Okudja mo1991 fiyo onena, elelo lUukwamba ola kala momake Elenga lakula lUukwambi Herman Ndilimani Iipumbu oo vati xe a dja medimo lAakwaniilwa.
Edimo leehamba
“Otwa shangela omikanda kombelewa yaChief Herman Ndilimani Iipumbu lwoikando ya yooloka, hatu pula tu shakena tu kundafana kombinga yoshikumungu yoku a lula Oukwaniilwa ashike ina tu pewa enyamukulo,” ta ti.
Amwaama okwa yelifa ta ti ova shanga omukanda kombelewa yelelo omudo wa djako nokwali va lombwelwa kutya otava shakane nelelo neudo muJanuali.
“Eshi Januali a fika ina tu shakene nelelo. Natango otwa shanga omukanda ashike ina tu nyamukulwa,” ta ti.
Okwa hokolola ta ti vo itava taata Chief Iipumbu a djeko koshipundi ashike ova hala okukundafana naye nombili opo Uukwaniilwa u kale wa a lukila moshitunda shUukwambi.
“Ngeenge otwa kundafana naChief Iipumbu pamwe nelelo laye ohatu ka kufa omunhu a dja mepata lAakwaniilwa ndele ta ningi ohamba ngaashi naana kwa li tuna eehamba da dja mepata lAakwaniilwa moshilongo [shUukwambi],” ta ti.
Okuhaudafana nohofa
Amwaama okwa ti omudo wa djako epata leehamba okwa li laka talela po kIiti Kiindhiluka oko kwa fudikwa eehamba depata lavo, ashike ove li hanga va twala komhangu, noku futifwa.
“Elalakano letu okwa li twa hala okutala eembila dovakwapata vetu ndele hatu kundafana ongha edimbo, nghene tuna okuditula omamanya shaashi kadi li monghalo iwa,” ta ti.
Ta ti vo onga ovakwapata veehamba, ovo ve na oshinakwanifa okutula omamanya, ile omadidiliko eembila dovakwapata vavo.
Ashike elelo laUukwambi vati eshi leshi uda ola ya komhangu ndele ta li ti kutya ongudu yepata lAakwaniilwa okwali la ka nangeka ohamba mUukwambi.
“Ka shishi sho shi li. Fye okwa li twa katalela po eembila dovakwatapa vetu,” ta ti.
Monghendabala yoku uda sha okudja kElelo lUukwambi Chief Iipumbu okwa lombwela Kundana ta ti ye ke na eshi ta to koingumungu yoipupulu.
Uukwambi Traditional Community
Kakele kOkomitiye yAakwaniilwa, Tangy Mike Tshilongo oo ta ti oku li oshilyo shongudu tai liifana Uukwambi Traditional Community okwa ti oku kala koshipundi kwaChief Iipumbu onga omuleli omukulunhu wUukwambi kaku li pauyuuki shaashi vati ina dja mepata lOkwaniilwa.
Omudo wa djako Tshilongo okwa li a unganeka oshiongi mOshakati nelalakano lokukufa Chief Iipumbu koshipindi ashike ka kwa li sha twikila komesho shaashi sha kalekwa kopolifi.
“Aakwaniilwa ovo na va hoolole omunhu wavo ou ta ka ninga Ohamba yuUukwambi ndele ita tulwa ko kepangelo,” ta ti.
Okwa ti okwa yandja omafiku 30 kuChief Iipumbu opo a kale a djako koshipundi shaashi vati ina dja mepata lAakwaniilwa.
“Onda shangela natango omukanda kombelewa yaminista womalelo needolopa nomayambulepo okomikunda James Sankwasa handi pula opo a ye mo shikumungu eshi. Onde mu pa omafiku 14 opo kala a nyamukula nge,” ta ti.
Tshilongo okwa ti ye okwa hala Omukwaniilwa a dja mepata leehamba dUukwambi ngaashi naana omalelo aeshe moshilongo ta wilikwa keehamba.