Auleria Wakudumo
Oproyeka yolwishi yaUnam Ogongo oya mona eteyo li li nawa – naashi otashi pandulilwa omuloka woneudo wali muwa.
Omupeduwiliki waUnam Kenneth Matengu okwa holola kutya ova wedela onhele yokukuna olwishi okudja peehecta 4.1 odula ya dja ko fiyo okeehecta 6.7 neudo.
“Molwaashi onhele yolwishi oya wedelwa neudo, oproyeka oya teelelwa i te ye olwishi li fike peetona 19 neudo. Odula ya dja ko, Unam okwali a teya eetona 15, sha hala kutya neudo ota te ya olwishi li hapu li dule odula ya dja ko,” Matengu ta ti.
Matengu okwa ti oshiputudilo shokOgongo osha ninga kamana kandongo mounamapya nounaimuna molwa ekwafo olo hava pewa okudja kepangelo laJapan okupitila moJica oshoyo ehangano loDebmarine.
Neudo Unam okwa dimbuluka efiku lokute ya olwishi koshi yoshipalanyole “okuyambula po edu la wapalela okukuna olwishi mokati kaanangeshefa vanini okumona oyuuyemo nokufinda ondjala”
Unam okwa ho ol o l a oshipalanyole eshi okutwa omukumo nokuendela pamwe nonghalo yomhepo ngaashi okukuna olwishi pefimbo lefundja. Olwishi ohali xupu noupu momeva ile ponhele pena omeva a hapu.
Matengu okwa hol ola kutya Unam onghene ta twikile okukondjifa omikalo di lili noku lili okukondjifa elunduluko longhalo yomhepo, oshikukuta, nokuyambula po eliko loshilongo.
“Ka kele kolwishi, otuna yo ofaalama yeexuxwa nayo tai shi endifa nawa. Eshina lokutendula omayi kOgongo paife ohali tendula omayi e dule po 5 000 kodula shi dulife eshi kwali hali tendula omayi 370 meedula da ka pita,” Matengu ta ti.
Matengu okwa holola yo kutya ovanafalama novanafikola ohava kufa ombinga okulihonga nokulongifa oilkongifo yaUnam opo va kune nokuteya olwishi lavo.
Omukulunhu woDebmarine koshikondo sheedjo dopaushitwe Godfrey Ngaisiue okwa holola kutya Debmarine okwa li a yandja ekwafo lopashimaliwa shi fike poN$750 000 koshiputudilo shaGongo okukwafela oproyeka yolwishi neexuxwa.
“Nonande oproyeka inai shi endifa nawa pehovelo, paife out wete oidjemo ili nawa. Eehecta edi dali nale o4.1 paife oda ninga eehecta 8.65, odo 6.7 tadi tewa paife,” Ngaisiue ta ti.
Okwa kwashilipaleka kutya Debmarine ota twikile okuyandja ekwafo moshiwana.
Maria Shetunyenga, omukalimo womomukunda Epalela mOgongo oye umwe womovanelao ava va deulilwa ounafaalama wolwishi mOgongo.
“Eshi twa hovela oshikunino sholwishi mo2021, otwa tameka nokanele kashona shaashi kwa kwali tuna owino ya wana,” Shetunyenga ta ti.
Shetunyenga okwa ti nande tave shi endifa nawa, ovena natango omashongo ngaashi omhumbwe yomeva. Okwa ti ohava longifa omeva omokanala okutekela olwishi oo haa dulu okupwiinina mo ile a kale inaa wana unene pefimbo lokwenye.
Momudo 2024, ova teya eetona dolwishi dili 1.7.
Unam Ogongo okwa kala melongelo kumwe nepangelo laJapanese okudja momudo 2002 eshi a ya meudafano l opakafimbo nehangano laJapan hali ifanwa oJapanese International Cooperation Agency (Jica) ola xula mo2004.
Mopai fe, Unam okuna eudafano natango naJapan, oproyeka tai ifanwa Japan- Namibia Rice and Mahangu oule weedula nhano.
-wakudumoauleria@gmail.com