ONGWEDIVA - Kansela woshikandjohoololo shaKongo Efraim Shipindo okwa ti oumbudi woimuna owa londa pombada moshitukulwa shaye. Okwa ti eengobe odo unene da ninga oihakanwa yokuvakwa po ngaashi keehambo.

Okwa yelifa ta ti unene tuu omikunda odo di li kombinga yeengamba daNamibia naAngola okwa didilikwa ovanhu tava vake po oimuna yavakwao. Shipindo okwa ti oshiwana oha holoka kombelewa yaye tashi nyenyeta eengobe dasho da vakwa po.

“Onda lopotela opolifi kombinga yoshikumungu eshi ashike oumbudi natango onghee ngaa tau twikile komesho,” ta ti.

Shipindo okwa ti konima ngeenge oshimuna sha vakwa po ohashi shingilwa moAngola omanga oimuna imwepo ohai twalwa komikunda da yooloka. 

Okwa kumaida ovanhu opo va longele kumwe momidingonoko davo okulwifa oimbudi woimuna.

“Ovanhu nava xulife po okulanda oimuna ihe na omikanda daye ile oupapa komatwi. Oovene vomikunda nava longele kumwe noshiwana okukondjifa oulunga woimuna,” ta ti.

Kansela okwa popya yoo vali ta ti opologalama yokuyambidida ovanafikola moshikandjohoololo shaye onghene ngaa tai twikile komesho

Okwa ti elalakano lopologalama ei okuyambidida ovanafikola ve li momhumbwe yoikwafifohongo.

Shipindo okwa ti ombelewa yaye oya didilika ounona vahapu komikunda da yooloka va pumbwa oikwafifohongo.

Onghee okwa ti naashi osha eta opo a kale a totapo oshikefa shokuongela oshimaliwa ile okukonga omakwafo oikwafifhongo komahangano a yooloka.

-fhamalwa@nepc.com.na