OSHAKATI-Oshiwike shomuthigululwakalo shoka sha ndhimbulukiwa noku tyapulwa oshiwike sha zi ko osha tumbalekwa momikalo dha yooloka, okuza koosikola, kaanilonga oshowo moshigwana oshilongo ashihe.

Omuthigululwakalo ohagu ndhimbulukiwa aluhe omumvo kehe, moshiwike oshititatu shaSepetemba.

Aanilonga naanasikola yokoosikola dha yooloka Etitano oyali ya zala ya opala, yeli momizalo dhopamuthigululwakalo, yamwe oyali ya teleke iikulya yomithugulwakalo nokuulikilathana esimano ya yo.

Kehe gumwe okwa zala omizalo dhomuhoko gwawo nenge ngoka a hala oku zala.

Aalongwa okwa li ya zala ya opala, omanga aalongi okwa li ya kutha esiku moshiwike moka, ya zala omizalo dhopamuthigululwakalo okusimaneka oshiwike shoka.

Rosina Shoopala omunasikola posikola Oshakati Primary okwa ti, oya li ya simaneke oshiwike shomuthigululwakalo momikalo dha yooloka.“Etitano atuhe otwa li twa zala omizalo pamwe naalongi yetu otwali wo twa tyapula iikulya yopamuthigululwakalo nokudhana iidhano yopamuthigululwakalo,” ta ti ngaaka.

Ta ti, aalongi yawo oye ya longo esimano lyomuthigululwakalo.

“Onda ilonga oshindji moshiwike moka. Atushe Aanamibia, tu na omihoko dhi na omithigululwakalo dha yooloka,” ta hokolola.

Ta popi ta ti, okwa tseya iikulya yopamuthigululwakalo yomihoko ngaashi Aakaprivi ya simaneka ohi yoZambezi Bream, Aakavango mboka ya simaneka omutete oshowo Aaherero mboka ya simaneka Omaere oshowo onyama. 

Ta ti, okwa tseya wo natango shoka sha pitikwa nenge sha indikwa momihoko dha yooloka, ano mbyoka ya talika ko onga iipwe nenge iidhila,” ta popi ngaaka. 

Shoopala okwa lombwele Kundana ta ti, oshiwike shoka oye shi tyapula nawa lela, nokwa ilonga mo oshindji. 

Victor Mutota ngoka ha hiti osikola posikola Mwadhina Gwanembenge okwa ti, oya li ya fatululilwa kutya omuthigululwakalo ogwa simana nogu na okusimanekwa sigo aluhe.

“Otwa longwa kutya omuthigululwakalo ogwa zi nale nogu na okusimanekwa sigo aluhe oshoka anuwa oshinima sha adhika ko nale, go kagu na okudhinwa,” ta hokolola.

Ta ti, oya li ya fatululilwa kutya omuthigululwakalo ogo omaukwatya  gomihoko dhontumba, gwi ikwatelela kelaka, eitaalo, omaihumbato, iikulya , omizalo , iiyimbo nosho tuu.Mutota ta ti, okwa ilongo mo wo kutya aantu oye na okusimanekathana oshowo okutaamba uukwatya wooyakwawo. 

“Oyendji oya kanitha eitaalo lyomuthigululwaka omolwa ya lamba shoka taya longwa kaakwiilongo nenge taya landula omikalo dhawo,” ta popi ngaaka. 

Namibia omuyamba pamuthigululwakalo, ngoka gu na okusimanekwa nokulandulwa komihoko adhihe. – vkaapanda@nepc.com.na