OSHAKATI- Oshituthi shomagongo shoka hashi dhimbulukiwa omumvo kehe, nuumvo otashi dhimbulukilwa koshitunda shUukwambi.
Elenga enene lyUukwambi osho wo omunashipundi gwomalelo gopamuthigululwakalo gokonooli Herman Ndilimani Iipumbu okwa ti shika otashi ka kala oshikando oshitiyali elelo lyUukwambi tali unganeke oshituthi shomagongo.
Ta ti, oshiindingili shoka otashi ka kala ko muMai kOnamega, hoka taku ka holoka aaleli aakuluntu, aaleli yopamuthigululwakalo , aanangeshefa yoondondo dha yooloka osho wo oshigwana.
“Oshituthi shomagongo ohashi yakulwa komalelo agehe gahetatu gomuhoko gwAawambo kuumbangalantu woshilongo, ngaashi lyUukwaluudhi, Ondonga, Oukwanyama, Ongandjera, Ombalantu, Uukolonkadhi, Uukwambi osho wo lyaMbadja,” ta ti ngaaka.
Iipumbu okwa ti, ngaashi shi li onkalondjiigilile, oshituthi shonuumvo osha longekidhilwa owina sho shi hambelele nokutanga omagongo ongoshikunwa shAawambo. Ta fatulula kutya, oongongo mono omagongo haga kolwa osho wo mono iinima iikwawo hayi kuthwa ngaashi omahuku, odha talika ko ongoshilimbo shopaushitwe mono oonkalamwenyo dhaakalimo yokiitopolwa hoka dhi ikwatelela.
“Aawambo ohaya mono oshindji okuza momuti gomugongo ngaashi omuzile, oshinwa, omagongo, odjove, oongongo osho wo iikuni,”
Elenga enene lyUukwambi Iipumbu okwa ti ethimbo lyomagongo, pamuthigululwakalo gwOshiwambo, ihaku pangulwa oshoka anuwa otashi vulika omupogoli kaa li e hi sho tangi oshoka pamwe okwa li adhika a nwa.
“Oompango ndhoka odha zi muuyuni wonale, onkene otwa tsikile nadho sigo onena ongesimaneko lyomuthigululwakalo gwetu,’’ Iipumbu ta popi ngaaka.
Ta ti, oshoka omugongo ohagu kolwa ashike lumwe momvula okuza momwedhi gwaFebuluali, nongele wa kuka opowo ano oha pu piti ethimbo ele inaagu nuwa.
“Omagongo oga kala ogo ashike oshikolitha monakuziwa, onkene opwa tulwa oompango kutya itaku endwa niilwitho oshoka ngele aantu ya nu ya pitilila otaya pogola. Ndyoka olyo etompelo aantu ihaaya pangulwa ethimbo lyongongola, iihokolola ohayi tameke muApiilili,’’ ta popi ngaaka. Okwa gandja oshiholelwa kutya uuna omukiintu a pewa enkawa megumbo pethimbo lyomagongo komusamane, kali ha pewa ombedhi oshoka otaku fekelwa a nwa ongongola.
“Oshituthi shomagongo kashi shi okunwa ongongola, ihe okuhambelela iipalutha ya longekindhwa kuNampongo osho wo okusimaneka nokukwatela po omuthigululwakalo,’’ omupopiliko gwelelo lyOndonga Frans Enkali okwa li a fatulula ngaaka.
Enkali okwa li a thindi omuthindo kutya ethimbo lyongongola oshigwana osha indikwa okwenda niilwitho.
Ta gwedha po kutya oompangu dhopamuthigululwakalo pamuthika gopamikunda ohadhi kankamekwa manga sigo omagongo ga kuka.
Ta ti, ongongola otayi vulu okugandja oompito dhiilonga nohayi gandja iikulya niikunwa osho wo ohayi longithwa poompito dhilwe.
-vkaapanda@nepc.com.na