Ouhonapare wOmbazu wa Hoveka mau rikwamba koruhoze rotjikutu tja Nujoma, Kondombolo, Mushimba na Katjimune na iho otjiwaṋa atjihe tja Namibia wina momairo waIhe yOtjiwaṋa nOperesindenda Ondenga ya Namibia, omuyaruke Omuheṋendu Sam Shafishuna Nujoma. 

“Omeriyandjero we omahaivaive, nounane we wouye komeho wa twara kongutukiro ya Namibia, aupe ehi retu onduri mouyenda waro nau pangiṋa orutanga ndu maru ya,” ouhonapare mau tja morutuu rwawo roruhoze. Ngunda ape ri nao orutu romuyaruke Nujoma erero otji rwa zire motjihuro ohongora tja Tjomuise momautiro wotupoo kotukondwa tjiva twehi kutja ovakwatera ve mu virikize. Okukautira kEtuda kOrukondwa rwa Musati erero nu ndino ama ru i kOenhana kOhangwena nu muhuka aru ri mOrundu mOrukondwa rwa Kavango kOutjiro. Osondaha tji ye ri 23 komueze mbwi ruri mOkatima Muriro mOrukondwa rwa Zambesi nu Omandaha mOtjozondjupa mOtjivanda. Oritjavari Omerongo mEzorongondo nOritjatatu mOtjozoroue mOrukondwa rwa /Kharasa. Oritjaine tji ye ri 27 ku Tengarindi orutu rwe otji maru kotoka mOtjomuise nu Oritjatano tji ye ri 28 komueze mbwi ape kara ondjozikiro osenina pOrutjandja rOngutukiro nu Oroviungura tje ri etenga ku Seninarindi a suvisiwa pEtjo rOzombanḓe. 

Ouhonapare wa Hoveka mau tja omuyaruke Nujoma we rikwamba ku nomuyaruke Ombara Otjitambi Hosea Katjikururume Kuṱako, nomuyaruke Fanuel Jariretundu Kozonguizi, eye wina wonganda yOuvara wa Hoveka, okutwara otjirwa tjongutukiro ya Namibia komurungu nokuhinda orutuu orutenga romutjemo kOmihoko Omikutasane. “Ozongondjero zawo nḓe ha ri nomayandero onḓa tunga otjirondero tjongondjero yokombunda yongutukiro, nu korusenina oukutuke nongutukiro,” Ouhonapare mau tja. Ongondjero tji kweya kouhonapare wa Hoveka tjandje ndji ha utirire pu Kozonguizi uriri nungwari ndja utire pOmbara Nikanor Katookui Hoveka, eye pu na Kuṱako, mbari ovandu ovatenga okuhinda orutuu romutjemo kOmihoko Omikutasane amave tuurungire mOmuhonge Michael Scott mo 1946. Mbwari omutjemo mbwa tjiukisa kouye omauhasemba wotjihoromende tjohuurire yombangu yotjivara tja South Afrika. Tjandje oruveze ndo nao otjiwaṋa tja huku ohuurire yEhi rOvandoitji nOtjiṱiro Otjindjandja tjayo kOvambanderu, Ovaherero nOvakwena. 

Kayari Ombara Katookui Hoveka na Kozonguize uriri mba kara norupa mongondjero yongutukiro ya Namibia nungwari omukwatwa wonganda ya Tjimana warwe, Omuhonge Asaria Kamburona wa kara norupa orutwe mokuhenisa Nujoma mehi ma yende ma karwisire otjiposa pendje nganda a kavaza Omihoko Omikutasane nu harukuru Oswapo ya Namibia i katoore ozondjembo.