ONANDJOKWE – Ovakainhu ve li humbata kEwalanda koshipangelo shaNandjokwe tava nyenyeta shaashi oikulya yavo, ominambo oikutu noikuni hai vakwa po kuvakwao.
Pefimbo Kundana a talela po Ewalanda kOnandjokwe oshivike sha dja ko ovakainhu ova hokolola tava ti vamwe vomoomeme ovo hava ka pulumuna tete ohava tweelele oinima ya vakwao ovo tava fiye mewalanda.
Ova hokolola tava ti neengodi davo dopeke ile oimaliwa oha di vakwa po kovakainhu vakwao.
Ewalanda onhele oyo ha kukala ovakainhu ve li momateelelo va ka teelela ngeenge ve li popepi nokupulumuna.
Ewalanda oha li kwafele ovakainhu ovo hava di komikunda dokokule shaashi ngeenge tava fetwa iha va ende vali oshinano shile molwashi ola tungwa li li meni loshipangelo.
Omunambelewa ta longele kEwalanda, Otillie Handunge okwa koleka ta ti ombelewa yaye oilopotelwa omanyenyeto ovakainhu va kanifa omaliko avo.
Martha Muhole a dile komukunda Okalumba okwa hokolola ta ti oshivike sha dja ko okwa kanifa oshimaliwa shaye sheeN$200 osho va ti shakufwa kongodi yaye yopeke.
“Onda yandja ongodi yange kumukwetu opo a dengeko. Okudja opo mboli okwa kufa ko oshimaliwa shoEwalleta osho kwa li sha tuminwa kongodi,” ta hokololola.
Magdalena Tobias a dile komukunda Otunganga okwa hokolola ta ti okwa etelela oshako yokunino kEwalanda ashike aishe oya vakwa po.
“Paife ohandi katyava oikuni kokule molwashi oikuni yange oya vakwa po. Otwa lulilwa koumbudi wa hanya kEwalanda,” ta ti.
Okwa weda po ta ti ngeenge ve ya kEwalanda ohava etelele omilambo ashike nando oha di vakwapo.
Ovakainhu ova hokolola tava ti ova taalela omashongo oombishi hava ende kombada yeembete davo noshoyo okulya mo oshivelelwa shavo.
Ewalanda e li oha ku holoka molwaalu muhapu wovakainhu efiku keshe ve uya okuteelela okupulumuna. Oshivike sha dja ko Etitano kEwalanda okwa li ku na ovakainhu 96 ve li momateelelo.