OHANGWENA – Moshitukulwa shaHangwena omu na eefikola 244 di na opologalama yokuyandja okatete kovanafikola naashi otashi ulike kutya epangelo otali longo nelitulemo okuyambidida eefikola. 

Ovanafikola 91 000 hava kofikola keefikola da yooloka mOhangwena ohava pewa okatete keefikola davo. 

Edi oda kolekwa komulukunhuwiliki wehongo moshitukulwa shaHangwena Isak Hamatwi. 

Hamatwi okwa ti okatete oka fimana keefikola di na eendodo dopetameko. 

Okwa yelifa ta ti ovanafikola ve li meendodo dopetameko ihava faula vali eetundi shaashi ove hole okulya okatete. 

“Okatete otaka tu ovanafikola omukumo nokuxwaxwameka okukala ve li tula mo meetundi davo. Oha ka liwa efiku keshe pefimbo lokapaushe,” ta ti. 

Okwa yelifa ta ti eefikola ashike odo dina eendodo dopetameko hadi pewa okatete molwashi oko kuna ounono vanini. 

Okwa pandula epangelo eshi ta li twikile nokuyambidida eefikola nokatete osho yo oikwafifohongo imwepo. 

Hamatwi okwa ti ngeenge efiku olo oufila wokatete owa pwa po ovanafikola ohava faula keetundi. 

Omukulunhiwiliki wehongo, natango okwa ti ovahongifikola 179 ova kutwa omudo wa dja ko moshitukulwa shaye. 

“Paife otwa pumbwa ashike ovahongifikola 34 opo tu dule okukandula po omukundu wovahongifikola ina va wana keefikola,” ta ti. 

Hamatwi okwa popya nonande epangelo ta li kendabala okundula po omaupyakadi a taalelwa keefikola, omashongo onghee ngaa natango a didilikwa keefikola. 

“Otuna ovanafikola ve li meengulu va finana mo osho shi li eshongo linene,” ta ti. 

Okwa ti omudo keshe epangelo oha li tungile eefikola eengulu dipe dokulongela ovanafikola. Hamatwi okwa ti oshitukulwa shaye osha pumbwa eengulu 800 dokulongela ovanafikola. 

“Otwa teelela okupewa enyamukulo okudja keembelewa da kula dehongo. Otuna omukumo kutya epangelo letu ota li kandula po omukundu ou,” ta ti. 

Okwa weda ta ti natango, ovena oupyakadi weefikola dimwe dina oundjuwo wa kulupa osho sha nyika oshiponga kofikola. 

Okwa pula ovanangeshefa ile ovawilike vopapolitika vena ehalo opo vaka yambidide eefikola di li momhumbwe nokushakeneka epangelo ondjilakati. 

-fhamalwa@nepc.com.na