Auleria Wakudumo 

Omupresidente Netumbo Nandi-Ndaitwah okwa ulika ovakalelipo voshilongo ovo hava kalele po oshilongo kondje yoilongo ya yooloka vaheyali onghela. Ovo va ulikwa kOmupresidente omwa kwatelwa omupopiliko wombelewa yOmupresidente nale Alfredo Hengari. Hengari okwa ninga omupopiliko woshilongo koBelgium. 

Omupresidente okwa ulika yo ngoloneya woshitukulwa shaHangwena nale Walde Ndevashiya a ninge omupopiliko woshilongo koNigeria omanga Goms Menette a ulikwa a ninge omupopiliko woshilongo koZambia. 

Nandi-Ndaitwah okwa ulika yo omukulunhuwiliki mouministeli wounamapya nounaimuna, eeshi, omeva nomatalululo omadu Ndiyakupi Nghituwamata a ninge omukalelipo woshilongo koGhana omanga Rosina // Hoabes a tumwa a ka popileko oshilongo koJapan. Weich Murcle Uapendura Mupya okwa ka kwatela komesho oiniwe yoshilongo koEgypt omanga David Thomas a tumwa a ka kalele po oshilongo koZimbambwe. 

Omupresidente okwa holola kutya okwa ulika ovakalelipo voshilongo koilongo ya yooloka sheli kolelela koveta onhinatu yokatendo kativali (c). Okatendo oko ohaka pitike omupresidente a tofe noku ulika ovo a tala kutya ove na owino yokukalela po oshilongo kondje yoilongo ya yooloka. 

Nandi-Ndaitwah okwa holola kutya oku na elineekelo mwaavo a tuma kutya otava ka longa ngaashi va teelelwa, okutula nokuyakula oshiwana. “Ohandi mu indile opo mu ka amene oshiwana shaNamibia osho shi li kondje yoilongo kutya nee otashi lihange peni mounyuni,”  ta ti ngaho. Omupresidente okwa dimbulukifa ovakalelipo voilongo kutya ova teelelwa va kale have lilopota kombelewa kutya ova longa ngahelipi. Okwa ti natango otava longele epangelo laNamibia nove na okuliufa keemhango. 

-wakudumuauleria@gmail. com