Abraham Mwanyekange
Ongudu yoIndependent Patriotic for Change (IPC) otaitwikile okukanifa ovawiliki peendodo dayoolokafana efiku nefiku.
Ou e li omuxwaxwameki wo-IPC moshilongo ashishe Shitefa Nande Mvula okwa shangela hamushanga wongudu yo-IPC momafiku avali aFebuluali neudo, e mu shivifile kutya okwa hala okufiya po oshinakuwanifwa shaye mongudu. Komapulo kutya omolwashike a hala okufiyapo oshinakuwanifwa shaye osho a longa oule weedula nhano okwa ti ita ti ko sha manga. Mvula okwa shanga kepandja laye lofacebook ta ulike eudo laye lonai molwoinima imwe oyo vati tai linyenge mongudu.
Mvula okwa tumbula kutya imwe oyokukala kwa li kwa ningwa omahoololo ovalel ouyuuki ngeenge tashi ya palongifo loshimaliwa nosho yo etekepo lomakwatafano pangudu neyandjo lomauyelele nokuwete kutya okwa li she mu fiya momhepo nokuli kutya okuna oshinakuwanifwa shafimana mongudu.
“Onghee ohandi pandula elelo lo-IPC eshi kwa li la pa nge nokwiinekelela nge oshinakuwanifwa.”
Erastus Shipanduleni Mwahafa naye oumwe womwaavo va fiya po oinakuwanifwa yongudu yo-IPC nokufiyapo ongudu filufilu. “Kandi na omukumo, eeghono, efimbo noikwatifo okutaalela oilanduli yakeshe odula, onghee ohandi fiye po nokudja mo mo-IPC pambelewa okudja nena mo 19 Januali 2026,” Mwahafa okwa shanga momukanda waye ou a tumina omunashipundi wongudu woshitopolwa Ohangwena. Mwahafa okwa li omuxwaxwameki wo-IPC mOhangwena. “Onda longifa N$14 000 okudja mo2020 fiyo onena,” ta ti.
Mwahafa okwa ti okuwete kutya okwa kala ta longo noudiinini petameko lela lo-IPC ngaashi okutandavelekifa etumwalaka longudu nokukutila mo oilyo ipe, ta weda ko ta ti keshe shimwe osha li komapepe aye. “Koitopolwa inatu pewa ko oimaliwa, omapulo etu itaa nyamukulwa, ekwatafano ola kana, omapulo etu ita manyamukulwa “, tati.
Okwa ti okwa li e na elinekelo kutya oinakuwanifwa imwe otai di ko komapepe aye eshi ongudu ya mona oipundi 20 momutumba wopashiwana ndele vati natango kemanya ku dja ondwi.
Mwahafa okwa ti paife ota pula nawa komesho nonghalamwenyo yaye nota twikile ekufombinga laye moikwapolitika. “Paife onde lipyakidila nokukonakona omakotamhango eengudu odo opo di tale ngeenge handi waimine imwe ashike nande ongaho ondi na nale ongudu oyo nda hala okuwaimina”, ta weda ko.
Omunashipundi wo-IPC kOmusati region Nuusiku Kadhila okwa koleka kutya okwa shivifila ewiliko lopombada kutya ita ka kufa ombinga momahoololo ongudu oo e li ko muMarsa neudo. “Ovanyasha nava kufe ko vali oshinakuwanifwa shouleli, otwe va palela ondjila sha wana,” Kadhila ta ti. Kadhila okwa li po24 momusholondodo woilyo womutumba yopashiwana yo-IPC mo2024. Komapulo kutya ota t iko ngahelipi koilyo yongudu tai fiye po oipundi yelelo osho yo-IPC Imms Nashinge okwa ti keshe umwe mongudu okwe uyile mo kuye mwene nomatokolo natango okudja mo o aye mwene.
“Kandi shi apa mwe likundila, oo omahokololo eni, eshi kwa li va waimina ongudu okwa li mwe tu pula? Oinima yo-IPC ihai likundwa novatoolinghundana,” Nashinge ta ti.