• July 13th, 2020

1400 kwagwana matengeko mosiruwo somunkama


Konyara vantu wokusika ko 1400 kwavapa matengekero morwa epuko eli vavagwana vaporosi mwaza sirongo morwa kapi vasikisamo veta ezi zo Covid 19 vatulire mosirugana kutunda mwa Nsinano 2020 ano ava vakwata kuna kara nye dogoro mwaKudumogona mvhura zeezi. Sinzi sowo vagwana epuko kuna kara wokurandesa ndi kunwa marovhu, yimo ana kutanta Ntoni gona govaporosi vaNamibia Oscar Embumbulu ogu kayitente momandaha ganapuko. Mokukwama vaporosi, 734, kuna kara vagazarerwa ava vapa matengeko morwa kulirwanesa noveta omu varandesa marovhu mosiruwo esi soveta zomunkama zakere mondambo zokuhova omu sirongo vasipete eyi yatamekere mo 28 Nsinano ntani kwayahaga mo 4 Kudumogona. Montambo nye zauvali, 374 kuna kara vagazarerwa morwa kupira kusikisamo veta. Embumbulu katente asi vamwe ava vanakugazara kwarugana epuko woowo wokutaguruka veta ezi tuna kara nazo ngesi muna kara asi 28 kwavafutisa. Kuvapakerera 904 kuna kara asi wokupira kusikisamo veta, ano montambo ezi zauvali kuna kara asi wokusika ko 1117 yiwo nare vana gwana epuko, ano ava 167 nare vafuta unzoni wawo, yina kara asi wokusika ko 950 simpe kuna kundindira vafute. 

Mokukwama Embumbulu, vanzoni kwavafutisa n$2000 morwa vana tambura epuko lyawo, ndi kuna kara nonompito mbali asi vaze kompanguro vakavapangure. Ano ava nuye vapira kufuta ngesi kuna kuwapayika ngendeseso omu navaza vakamoneke kompanguro vakatante asi morwa sinke vana kugazarera asi awo kapi varugana epuko. 
Simpe yige hena Embumbulu ana kutanta asi umbondo kwasesupa unene, mosiruwo esi tuna kara asi soku paruka somunkama mokuhetakanesa mo 68 zomazuva ganare. 

Eyi yaninkisa asi kupire maumbondo morwa mukaro nye ogu varugana vaporosi mokuninka asi nkenye evango hambara koveli nomu vavahangura omu navarugana siruwo esi somunkama. Momazuva nye aga 68, komeho tukaze momunkama, 1639 uhorokwa youmbondo yoyinene kwahoroka unene. Ano ngesi sivaro sina lihora 1369 posiruwo esi tuna kara soCovid 19. Nye nampili ngoso Embumbulu katente asi sivaro soumbondo mokuteza mambo kwaligwederera, komavango gonongesefa, widi woyimaliwa, kuvaka yimuna, ntani kulihamesera nye unene mokurandesa epangwe monomukunda horowere ngwendi Erongo, //Karas, Oshikoto ntani Zambezi.


Selma Ikela
2020-06-04 09:14:51 | 1 months ago

Be the first to post a comment...