Omukainhu weedula 35 okwa tambulilwa moshipangelo shaUtapi eshi vati a dengwa nekende lobiila komutwe, noneengoyo moshipala kumumwainamati pefimbo kwa li ve li keendingosho.
Oshiningwanima osha ningwa Etivali komukunda Onadhidhi moshikandjohoololo shaNesi, moshitukulwa shaMusati.
Omukulunhu koshikondo shokukonakona oimbuluma moshitukulwa shaMusati, omupedu Commissioner Moses Simaho okwa hokolola ta ti omufekelwa okwa li a kolwa pefimbo loshingingwanima.
Otaku hokololwa kutya omufekelwa okwa li tava tanguna namumwainakadona nokudja opo okwa tameka okudenga omukulu waye.
Omufekelwa oku na omido 22, okwa kwatwa po nota holoka momhangu.
Opolifi oya hokolola tai ti omulumenhu ou ota pangulilwa oshibofa shomahepeko omomaumbo.
Oshiwana osha kumaidwa opo shi xulife po okutanguna ngeenge shi li keendingosho molwaashi omunhu neenge a kolwa oha kwatwa komhepo yokulonga oshimbuluma.
Oshiningwanimwa shikwao, omulumenhu e heshivike okwa fya eshi a tuwa nombele kuwalye onghela efimbo longula.
Oshiningwanima osha ningwa molukanda Okayekongwe modoolopa yaUtapi. Opolifi oya hokolola tai ti omulumenhu ou okwe lituwa kovakwashiwana.
Oshiwana shomudingonoko waUtapi otashi indilwa opo shi kwatafane nokila yopolifi mOutapi nelalakano oku ka tala ngeenge omulumenhu ou omupambele wavo.
Opolifi oya pula yoo vali moshiwana kwaau e na ouyelele kombinga yomufekelwa ou opo oshiwana shi lopotele opolifi keshe i li popepi.
Omunhu ta ka yandja ouyelele okwa amenwa kopolifi onghee oshiwana nashi manguluke okulopotela opolifi keshe i li popepi.
Lopokati opo, omukainhu weedula 43 okwa kwatwa po shaashi vati kwa li a fiya ounona vaye vatatu meumbo nokonima okaana keemwedi 11 oka wila mevela lomeva nokuxulifa.
Oshiningwanima eshi osha ningwa momudo 2021 komukunda Uuhongo moshitukulwa shaMusati.
Opolifi oya hokolola tai ti omukainhu okwa kwatwa Etivali konima eshi opolifi ya kala nokuninga omakonakono kombinga yoshibofa shaye.