Omukulupe womulumenhu weedula 82 vati okwa tetwa okufya komonamati e na oudu wopamadilaadilo.
Oshiningwanima osha ningwa mexuliloshivike komukunda Oshilulu moshitukulwa shaMusati mexuliloshivike.
Nakufya okwa tongolwa oye Shiimi Shivute omukalimo womomukunda Oshilulu.
Omukulunhu koshikondo shokukonakona oimbuluma mOmusati omupedu Commissioner Moses Simaho okwa hokolola ta ti omufekelwa nanakufya ova li tava tete po omuti u li mepya eshi omufekelwa a tanaukila po xe noku tameka te mu tetaula nomakatana komutwe lwoikando ihapu.
Opolifi oya hokolola tai ti Shivute opo a xulifila ponhele opo molwashi okwa li vati a tetwa a monifwa oshiponga nomutwe.
Ota ku hokololwa kutya omufekelwa weedula 46 a shivika nawa onga omunhu e na ounghundi wopamadilaadilo molwashi okwa kala ta vele efimbo lile.
Omufekelwa okwa kwatwa po noku li ta ningilwa omakonakono opaunamiti koshipangelo shaShakati.
Oshiningwanima shikwao, olutu lomulumenhu ole li tuwa pomukunghulo wopate moWindhoek Osoondaxa. Ota ku hokololwa kutya olutu lomulumenhu ou ola hangika lina oipute tashi ulike kutya okwa dengwa.
Ka pena ouyelele kutya okwa dipawa kulyelye.
Opolifi otai pula moshiwana opo shi talele po okila yepangelo moWindhoek opo shi ka tale ngeenge omulumenhu ou omupambele wavo.