Hilma Nakanduungile
EENHANA- Omugundjuka gwedhina Iyaloo Daniel, gwomimvo 27 mEtitatu okwa gandja omiti dhiiyimati dhi li 75, kaakalimo yomoshitopolwahogololo shEenhana, opo ya ka tsike.
Daniel ngoka a yambukile momukunda Iitiyitoka mElombe nokwi ilongela uunamapya nuuniimuna ota ti, konima sho a mana okuninga omaidheulo ge na sha nuunamapya omumvo ga yi, okwa kwatwa kohokwe nokedhiladhilo lyokuninga oshikunino she mOndangwa.
Ta hokolola ngeyi kutya kakele kokumupalutha, iilikolomwa ye ohe yi landitha, a mone mo shokwiikwatha, nayilwe oha gandja kookuume, aashiwikile nosho wo koshigwana.
“Sho ndi iyadha ndi na omiti odhindji, onda kwatwa kedhiladhilo opo ndi gandje po dhimwe koshigwana shomoshitopolwahogololo shetu, nelalakano lyokushipenduthila ohokwe yokutsika omiti,” Daniel ta ti ngaaka.
Daniel okwa holola kutya limwe po lyomomaneneshongo a palamena olyo omeya.
“Molwashoka ondi li modoolopa, ohandi longitha ashike omeya gokopomba. Uuna ga pata nande uule woshiwike, iimeno ohayi si enota noonkondo, naashika oshi li eshongo enene kungame,” Daniel ta hokolola ngaaka.
Ota ti, yimwe po yomiipumbiwa mbyoka ta yuulukwa a kwathwe nayo ongaashi oonete dhokugamena iikunomwa ye komutenya, molwashoka okwa pupyala noonkondo.
Okwi indile wo aagundjuka mboka ya taandela momagumbo opo ya kuthe ko oongaku, ngele tashi ya kokunyangadhala.
“Aanyasha natu kambadhaleni okulongitha ompito kehe to mono nokashona hoka wu na, opo wu ete po sha shomupondo, sho shi vule okukuyambidhidha monkalamwenyo. Kaagundjuka mboka ye na oongodhi hadhi yi komalungula naye dhi longithe okupekapeka omauyelele ngoka tage ya kwatha, opo yi ihumithe komeho,” Daniel ta kumagidha ngaaka.
Okwi indile wo mboka ya pewa omiti ye dhi takamithe nokudhi sila oshimpwiyu, dhi vule okuya pa eteyo ewanawa.
Sho a taamba ko omiti, kamnsela gwoshitopolwahogololo shEenhana Olivia Hanghuwo, okwa pandula omugundjuka Daniel konkatu a katuka, noku uvaneke kutya ombelewa ye otayi kala nokutalelapo omagumbo niikondo mbyoka ya pewa omiti ndhika, nelalakano lyokutala ngele otadhi silwa tuu oshimpwiyu.