Omulumenhu omunamido 29 ta lumbu noulema onghela vati okwa ifana opolifi opo i mu popile kuina mumwainagona oo vati te mu hepeke. 

Jafet Ishidimbwa oo e na oulema wombuda, noku li kokatemba ota ti onghela okwa ponokelwa kumumwainagona, osho sha eta opo a dengele opolifi i mu popile. 

 Ishidimbwa oo a lelamanene mo2020 moshiponga shotuwa, okwa ti osho a ningilwa kumumaina onghela oshimwe ashike shomoinima oyo ha ningilwa kovapambele vaye. 

Ta ti konima yoshiponga, okwa kanifa oilonga yaye nosha eta a shune keumbo lavo mOshakati.

“Eshi onda tunga onduda yange oshoyo onhele yomalandifilo, opo ndi dule oku limonena mo sha,” Ishidimbwa ta hokolola.

Okwa ti vamwe vomovakwanedimo laye kava li va hafela ongeshefa yaye  nova kala hava taataya po eekastoma daye, osho sha ka etifa umwe womovamwaina a tete ko nolusheno laye.

“Paife onda fyaala pomutenya shaashi kandi na vali apa handi xupile molwaashi olusheno lange ola tetwa ko. Ame oshilema ihandi dulu okuya pomafiya opondje ndi ka teleke, ohandi uhala ashike nondjala yange fiyo handi teelele omukulu wange umwe a dimbuke e uye a telekele nge. Kombinga yoshimaliwa natango onghee ngaho handi mono oixuna shaashi nokaana kange kandi na kutya ohandi ka vatele ngahelipi shaashi kandi na oshimaliwa,” Ishidimbwa ta hokolola.

Hileni Angula omumwaina oo vati a teta ko olusheno okwa ti eshi okwe shi ninga shaashi Ishidimbwa ke na omikalo.

“Jafet oha tuku ovanhu ava tava hiila meumbo, yee ta penduka a ka xuxwile pomafiya ovanhu. Ovanhu eshi tave mu popi ohe va tuku oitya yakula, ndele te va lombwele kutya voo kave na eshi tave mu ningi shaashi okwa amenwa kepangelo omolwoulema waye. 

Oshili ota longifa eenghono daye doulema epuko,” Angula ta yelifa.

Okwa tumbula yoo kutya yee ke na efiku a patulule olusheno laIshidimbwa.