Omukalimo womomukunda Oniiwe Joseph Hangula okwa ti okwa dengwa pomutima eshi a kanifa oikombo yaye 22 ya fya eshi ya dengwa keemhawe pefimbo kwa li odula tai loko mexuliloshivike.

Oshiningwanima eshi osha ningwa efimbo lokomatango lwopotundi 17h00.

Okwa ti kashipu okukanifa omwaalu muhapu woufita woimuna shaashi oikombo yaye ohai mu etele oyuuyemo noshoyo okulya ombelela meumbo novakwapata vaye.

Eshi a ninga eenghundafana naKundana Etitatu, Hangula okwa ti okwa li e na oikombo 67 ashike paife okwa shaala po noikombo 45 konima eshi imwe ya fya.

“Inandi hangika mo meumbo pefimbo oikombo ya fya, onda hangika nda ya koilonga kEenhana. Onda dengelwa ongodi komukulukadi wange kutya oikombo imwe oya fya ya dengwa keemhawe dodula,” Hangula ta hokolola.

Okwa yelifa ta ti oikombo inai fya kokashelu ashike oya dengwa keemhawe shaashi okwa li i li moixwa pefimbo lodula tai loko.

“Paife oufita woikombo yange owa shuna pedu nomwaalu muhapu. Oikombo imwe ei ya fya oya fiya po oukombwena vashona omanga imwe okwa li ifimba,” ta hokolola.

Okwa weda po ta ti ova dingula ombelela yoikombo opo i kale vei lya po shaashi oikombo oihapu unene nokukupulwashi.

Hangula okwa ti efiku tuu olo ova kanifa yoo vali neexuxwa da fya kodula neenduda domeumbo dimwe vati oda wapo komhepo shaashi odula okwa li i na omhepo. fhamalwa@nepc.com.ma