Taimi Haihambo

ONGWEDIVA -  Omulumenhu weedula 30, womokunda Okambuwa okwa tulwa moipandeko konima eshi vati a vaka eengobe di li heyali odo di na ongushu yoimaliwa omayovi omilongo heyali.

Komufala wopolifi moshitukulwa shaShikoto Theopolina Kalompo-Nashikaku okwa popya kutya mwene weengobe okwa li a fiya eengobe daye koshi yefiloshisho lomunahambo ou ha kala nado. Okwa weda po kutya omufekelwa ou ha tonatele eengobe vati ke shi omunhu lela wokokule, shaashi okwa pamba omushamane wamwene weengobe edi da kana. Opolifi oya tonga kutya eengobe oda kana okudja Apiilili wodula ya dja ko fiyo oMai wodula ei.

Mwene weengobe eshi e ya okutalela po ohambo yaye okwa kundwa ashike koshuunda shihe na nande oyo ongobe imwe.  Eshi a pula ou ha kala noku di tonatela, okwe likanyuna nokunyamukula kutya yee ke shi nande apa eengobe da ya vati.

Omufekelwa okwa tulwa moipandeko vati nokwa patululilwa oshibofa shi na sha nevako leengobe. Okwa teelelwa yoo a holoke momhangu momafiku 17 Mai 2023 mOndangwa. Okwa tongwa yoo kutya kape na nande ongobe imwe ya monika, nomakonakono opolifi otaa pula komesho.

Inspekta Ellen Nehale okwa kunghilila oshiwana opo shi kale nasho hashi tonatale oimuna yasho nawa. “Ava mu na oimuna i li keehambo ningeni onghendabala opo mu kale hamu talele po eehambo deni,” Nehale ta weda po. "Kaleni yoo hamu kongo ovanahambo ovalineekelwa opo mu kelele oiningwanima ya tya ngaha," Nehale ta weda po.