Omulumenhu weedula 58 okwa nyekwa oshimaliwa sheeN$10 000 neeshapi dotuwa kovalumenhu vavali ovo kwa li va londa motuwa yaye. Oshiningwanima osha ningwa oshivike sha dja ko mondjila yokuya kOndangwa momukunda Okapya.
Omupopiliko wopolifi moshitukulwa sha Shana Inspekta Thomas Aiyambo okwa hokolola ta ti omulumenhu ou okwa nana oshimaliwa shoN$20 000 kombaanga yo-FNB kOndangwa.
Okudja opo vati nakuninga oshihakanwa okwa ya kOshakati nokonima manga e li mondjila yokushuna kOndangwa okwa hanga ovalumenhu vavali tave mu pula olefa noku va twaalela.
Otaku hokololwa kutya manga ve li mondjila omufekelwa okwa popya mongodi nokonima okwa pula nakuninga oshihakanwa kutya otava tulwa pOkapya. Opolifi oya hokolola tai ti eshi va fikama pomukunghulo wopate ovafekelwa ova nhukila mwene wotuwa noku mu ningila omatilifo ndele ta nyekwa omaliko aye.
Ovafekelwa ova faduka po va pitulwa po kotuwa yoNissan Tiida ya uka kombinga yaNdangwa.
Opolifi oya hokolola tai ti nakuninga oshikahanwa okwa umba ondjebo onghee otaku fekelwa kutya omufekelwa umwe oku na okukala a yashwa mokuulu. Kape na omufekelwa a kwatwa po nomaliko inaa monika.
Opolifi otai indile moshiwana ile koipangelo kwaau ta ka mona omunhu e uya okupangwa a monifwa oshipongo mokuulu opo oshiwana shi lopotele opolifi.
Oshiwana otashi kumaidwa opo shi kale sha kotoka ngeenge tashi twaalele ovanhu unene tuu efimbo loufiku molwaashi ovanhu paife ove lininga ookalyamupombo.