Omukainhu umwe mOngwediva okwa patululila mushiinda shaye oshibofa shaashi vati e mu ula kutya omulodi ye oha nangala ta liwa kumushiinda oye tuu oo. 

Nakupatulula oshibofa vati okwa hokololela opolifi kutya omuneumbo lavo umwe okwa shashaminwa omeva kumushiinda oo vati ta ti ovanhu vomeumbo loonakupatulula ove mu tumina oilulu, vo ova ninga omusamane waye a kanife oilonga.

Omukainhu ou vati okwa haluka ashike eshi a shashaminwa omeva kumushiinda kombuda, a hangika el i mokatala ke li pondje yeumbo ta kosho oikutu.

Omuneumbo ou vati okwa pula omufekelwa kutya omolwashike te mu shamine omeva kombuda, ashike vati ina nyamukulwa.

Opolifi oya ti nakulopota oshibofa vati okwa uda mushiinda ta popi mongodi kutya nakupatulula oshibofa omulodi, sho osho a tilila omeva moluumbo laye.

Vati mushiinda ota ti iha kofa nawa shaashi oha nangala te lidenge noilulu ya nakupatulula oshibofa, nomeva oo a tila moluumbo lanakupatulula oshibofa okwa nininwa oshilulu.

Omufekelwa vati okwa twikila kutya vati omulopoti woshibofa pamwe nomuneumbo waye ou a ningilwa omeva vati ite va pe ombili shaashi okwe va tilila omeva owina.

Aiyambo okwa ti omufekelwa naye okwa hokolola kutya omulopoti woshibofa okwe mu ulile omulodi konima eshi a kanifa oilonga yaye neudo petameko lodula.

Omufekelwa vati okwa lombwela yoo opolifi kutya oshikando shimwe omulopoti woshibofa okwa kufile edu meemhadi, ndele vati te li twala keendudu.

Okwa twikila kutya omufita wokongeleka oku ha i okwe mu lombwela kutya ota liwa komulopoti woshibofa.

Ovashiinda ava vavali vati ova kala nokuliula ovalodi, okudja mo2017, nova kala nale nokulipatululila oibofa okudja nale molwoinima ya yooloka.