Omulumenhu weedula 29 okwa tetwa meemhango eshi kwa li ta kendabala okulikufa omwenyo shaashi vati a tukwa kokatekulu kaye.
Oshingingwanima eshi osha ningilwa koRehoboth Omaandaxa efimbo lomutenya.
Omupopiliko wopolifi moshitukulwa shaHardap Inspector Linea Heita okwa hokolola ta ti omulumenhu okwa li ta kendabala okuya pokati kolwoodi la li pokati kokatekulu kokakadona oko ka li take lidenge nakahewa kako.
Vati okudja opo omulumenhu oo eshi a lombwela okatekulu ka xulife po olwoodi, oka tameka oku mu tukaela.
Opolifi oya hokolola tai ti omulumenhu oo okwa li a handukifwa komatukano oo a ningilwa, nokudja opo okwa kufa odalate ndele te I mangele momuti nokulitula meemhango.
Vati elao linene meemhango okwa tetwa mo kovakwashiwana ovo va hangika tava ende pondjila i li popepi nomuti omo kwa li e lileka.
Omulumenhu okwa twalwa koshipangelo shaMariental opo a ka mone omayakulo exungomwenyo.
Opolifi oya kunghilila oshiwana opo shi kale tashi ka konga omakwafo kovaxungimwenyo ile kovafitaongalo ngeenge sha handukifwa shaashi okulikufa omwenyo kaku shi e kandulepo lomukundu.
– fhamalwa@nepc.com.na