ON G W E D I VA - Omunaf ikola umwe koshiputudilo shoupangi shi li kOshikango, okwa pulwa a landule omunwe molwokavidio ka holoka komalungula. 

Otaku hokololwa oshiputudilo shedina Alba Chipamba Training Center sha taataa mofikola omunyasha wedina Maria Edward kuyele oshivike eshi. 

Edward okwa dimina kutya okwa tewatewa konima eshi kaume kaye a tula okavidio komalungula omo Edward a holoka e li moikutu youpangi. Okwa twikila kutya mokavidio okwa li e li mo te shi liningile nongalo ya shiivika nawa onga “Topa laat ons gaan” yee ekwete okahalasha peke ke na onamunate yocoke vati. “Okavidio oka eta omakuyunguto komalungula konima eshi ka fika keengodi dovanhu vahapu,” Edward ta ti. 

Okwa twikila kutya okavidio okwe ka ninga muFebuluali konima eshi opo a tambulwa mofikola youpangi. “Eshi onde shi ninga nelalakano ndi tumine ovakwapata vange shaashi okwa li nda hafa neenghono,” Edward ta tumbula. Okwa hokolola kutya okwe va kunghilila opo vaha tandavelife okavidio, shaashi okwa li eli momudjalo woupangi oo inau pitikwa okulihumbatelwa ngaashi okwa li te lihumbata. 

Okwa twikila kutya umwe womovakwapata vaye okwa ka tumina kaume kaye okavidio oshivike sha dja ko ndele te ka handjakanifa komalungula shihe li papitiko laye. 

“Onda papala ashike eshi handi ufanwa kokomitiye yokutulapo eemhango nelandulafano mofikola shi na sha noshiningwanima eshi. Konima onda ka pewa ombapila yetewo mofikola molwelihumbato lange mokavido nda djala omudjalo woupangi,” Edward ta tumbula. 

Okwa wedapo yoo kutya fimbo a li ta pangulwa kokomitiye yeemhango nelandulafano, vati oya tumbula kutya okwa li e li koshi yelongifo loingangamwifi oshoyo omalodu pefimbo a li ta ningi okavidio. Ovanambelewa vokoAlba Chipamba ova anya okupopya noshifokundaneki pefimbo lomapulapulo shaashi vati oshiningwanima oshiholekwa shofikola. 

Mathew Mupetami omunafikola wokoshiputudilo shaNUST, oo ta fekelelwa ehandjakanifo lokavidio komalungula, okwa tumbula kutya yee okwe ka tula ashike kepandja laye lopaungoba hali ufanwa WhatsApp. Okwa twikilikila kutya ovanhu ova tameka oku mu pula e va tumine okavidio ndele take lihanene omalungula aeshe. “Elalakano lange kakwa li okuningila omunhu ominyonena, ame kakwa li ndishi ngeenge otashi ka ya kokule ngaha onghee onda hala okuyandja ombili,” Mupetami ta tumbula. 

Edward aveshe naMupetami ova kunghulila ovakwashiwana va kotokele oinima ei hava handjakanifa komalungula shaaashi oinima imwe otai dulu okukanififa omunhu onghalamwenyo yaye. 

Omupopiliko wehangano laNANSO Dorthea Nangolo okwa tumbula kutya ovatula oshiningwanima eshi moilonga notava kendabala okuninga omapekapeko aeshe e lixwa po okuvatela Edward opo a shune mofikola. “Ngeenge Alba okwa anye okushuna Edward mofikola konima yomakonakono aeshe noina pa monika epuko lasha, ohatu ka pata oshiputudilo ile tu ka holoke komhangu,” Nangolo ta ti.