ONETHINDI - Omulumenhu weedula 43 vati okwa xulifila mobashu yakaume kaye konima yokuya moixulo.

Otaku hokololwa omulumenhu ou a pula epitiko okulongifa okabashu kakaume kaye, omo va ka nangala nomukainhu ehe shi omukulukadi waye efimbo lomutenya. Konima yokuya moixulo, omulumenhu oo vati okwa lombwela omukainhu kutya ota vele monhulo nokudja opo okwa tameka ta di etutu komayulu nokuxulifa.

Ovo ve shi nawa omulumenhu ou otava hokolola kutya omusamane ou okwa hombola ashike omukainhu ou a li naye okwa li nale omunailonga womeumbo lavo.

Nakufya okwa fiya po omukulukadi waye nounona vatatu.

Pefimbo Kundana a talela po eumbo lanakufya pOnethindi, ovakwanedimo ova holola nghene va udifwa nai kopolifi molwaashi ya yandja ouyelele moshiwana u na sha nonghalo omo mwa fila omukwapata wavo.

“Opolifi okwa li ya wana okueta omukainhu a hangika naye opo e tu lombwele kutya oshike sha ningwa po. Paife otwa fifwa ohoni eshi okaana ketu taka shundulwa,” omukwapata umwe ta ti.

Okwa hokolola ta ti efiku olo okwa hangika ashike opo a popi nomulumenhu oo lwopotundi 13h30.

“Lwopotundi 14h00 moshanga shomutenya onda mona ovanhu ve uya meumbo lange tava lombwele nge kutya okwa xulifa,” ta hokolola.

“Ovanhu aveshe ohava i moixulo novakulukadi vokondje ashike ihava shundulwa moshiwana,” ta hokolola.

Omupopiliko wopolifi omupedukomufala Kauna Shikwambi okwa ti omukainhu ou a li nanakufya ita dulu okupopiwa naye shaashi okwa haluka neenghono.

“Opolifi oye lipyakidila nokuninga omakonakono omoule. Ovakwapata otava ka lombwelwa oshietifi shefyo ngeenge omakonakono okwa pu okuningwa,” Shikwambi ta ti.

fhamalwa@nepc.com.na