OSHAKATI  - Yamwe yomaagundjuka monooli oya pandula omupresidente Hage Goingob sho a lundulula oonkalamwenyo dhawo okupitila mooproyeka dha yooloka, dhoka dha yambindhindha aanyasha.

Selma Nashilongo gwokOutapi ngoka ngaashingeyi e na oshinayeta she mwene okwa ti, onkamwenyo ye oya lunduluka sho a yambindhindhwa neshina lyokuhondja oshowo iilongithomwa yilwe.

“Onda li nda pewa iilongitho yokuhondja okupitila moprogalama yoku yambindhindha aanangeshefa aashona omimvo ndatu dha piti, ihe ngaashingeyi ngame omuhona,’’ ta popi ye ta imemeha ngaaka. Ta ti, okwali a mono omakwatho ngoka okupitila moombelewa onene dhoshitopolwa, sho omupresidente  Geingob a li a tokola opo aanyasha ya yambindhindhwe, ya vule okunyangandhala yo yene. Ta popi ta ti, ota ndhimbulukwa Geingob, ta kumagindha aanyasha yalonge nuundhiginini, opo ya vule okuyambindhindha aakwanezimo yawo.

Maria Nicodemus okwa ti, okwa yambindhindhwa kepangelo opo a kale mpoka e li nena.

Nicodemus okwa ti, pethimbo Geingob a li koshipundi, okwa yambindhindhwa niikwathithi oyindji okutameka oshikunino she, shoka ngaashi ngeyi oyendji momukunda Elim oya ningi ositola yiikwamboga. Ta popi ta ti, oshikunino she ngaashingeyi osho hashi mu palutha.

Omutoolinkundana nale Ileni Nandjato, ngoka ngaashingeyi omunaafalama gwiikamboga, okwa ti omupresidene Hage Geingob okwali a simaneka iikundaneki.

Ta ti, ota dhimbulukwa nawa, pethimbo Geingob a yi koshipundi, okwali ena aagandi ye yegameno ya kwata miiti, mboka ya kala nokufuka aakundaneki yalonge iilonga yawo ya manguluka, ihe shoka ka kwali he shi pitike.

Ta popi kutya, esiku limwe sho a li a talele po ondoolopa yOshakati okwali a yelethile aakeeli ye kutya, naya ethe aatolinkundana yalonge iilonga yawo, mpoka opo aakundaneki ya zi haya pewa esimaneko oshowo uukalata woku longa piituthi pun a omupresidente.

Ta ti, omwenyo gwe nagu vululukwe mombili. 

– vkaapanda@nepc.com.na