OSHAKATI -Uuministeli wuuhaku nonkalonawa owa popi kutya kehe omuleli itaaka lopota omahepeko taga ningilwa aanona ihe oku na owino, otaka mangwa po kopolisi, shoka tashi ka ningwa sha ikolela kokatendo 3 komomumvo 2015.
Owa popi kutya, aaleli mwa kwatelwa aalongi, aasita, ooyene yomikunda, aapangi, aavali oshowo mboka haya uhala naanona ethimbo olyindji.
Ndhoka okwa li dha popiwa mehuliloshiwike, esiku lyedhimbuluko lyuundjolowele wopamandhilandhilo mOshakati.
Omuhungimwenyo muuministeli wuuhaku nonkalonawa Donata Tshivoro esiku ndyoka okwa li a popi kutya oshinakugwanithwa shakehe gumwe, okulopota okanona ka taalela omahepeko.
“Aanona oya pumbwa okuyambidhidhwa uuna ya taalela uupyakadhi womahepeko ga yooloka, oshoka wumwe itau vulu oku shi ninga kuyo yene,” ta fatulula ngaaka.
Tshivolo okwa ti oyendji kaye na ontseyo kutya ope na omusindalandu tagu ti, kehe omuleli ngoka itaaka lopota omahepeko ga taalela omunona, ota vulu okupatulilwa oshipotha.
Ta ti, omahepeko ohaga vulu okupiyaganeka omadhiladhilo gokanona shoka tashi vulu wo okuyonagula onkalamwenyo yokanona.
“Okatendo haka okwa li ka totwa mo mo2015, sho ka ka pinge na po “the child act no 33 of 1960”, noka li ka tulwa miilonga okuza mo 30 Januali 2019,” ta popi ngaaka.
Ta ti, okatendo hoka oka li ka yi miilonga nelalakano lyokusila aanona oshimpwiyu oshowo oku ya gamena komahepeko nomiyonena taya vulu okutaalela.
Martha Negonga omuhingimwenyo gwomomikunda okwa li a popi esiku ndyoka kutya onkatu ndjoka oya li ye eta omalunduluko moku gamena aanona, sho aahungimwenyo ya li ya indjipalekwa miitopolwa okugandja omakwatho gwomakumagidho, okupitila muuministeli wuuhaku nonkalonawa.
Negonga okwa ti, okuza pehulilo lyomumvo gwa yi, aahungimwenyo oya lumbu niipotha oyindji ngaashi yaanona ya ekelwahi kooyina , aanona yi itekwa kaakuluntu yawo, aanona ya taalela omahepeko gwomomagumbo oshowo aanona ya kwatwa koonkondo.
“Nonando uuministeli wa kambandhala okwaandjaneka aahungimwenyo moshilongo natango ope na ompumbwe onene yaahungimwenyo okulwitha nokushonopaleka iipotha yoludhi ndoka,” ta popi ngaaka.
Ta ti, Namibia ngaashiingeyi oku na omuhungimwenyo gumwe gwaanona ye vule 13 000, ihe ina gwana.
Ta tengeneke ta ti, ngeno kehe oshikandjohogololo oshi na okukala shi na omuhungimwenyo.
Ta yelitha ta ti, omuhungimwenyo ota vulu okushonopalitha iipotha yomahepeko gaanona, ihe ita vulu okuya muule woshipotha.
Negonga okwa ti onga omuhingimwenyo, okwa ndhindhilike kutya omawi gaanona okupopya omaudhigu gawo, inaga yalulwa, onkene okatendo haka okeya pa uuthemba okupititha omaupyakadhi gawo.
Natango okwa totha mo natango uupyakadhi womategelelo inaaga longekidhwa mokati kaanona.
vkaapanda@nepc.com.na
Omahepeko… Omahepeko gaanona naga lopotwe.
Efano: Victoria Kaapanda