Victoria Kaapanda

Amushangandjayi gwehangano lyaalongi lyedhina Teachers Union of Namibia (TUN) Mahongora Kavihuha okwa ti, oya hala oondjambi dhaalongi dhi gwendhelwe momumvo ta guya. Ta ti, ngele shoka inashi ningwa otaya ka ya moonkundathana nepangelo, okuziilila momapandaanda.

Kavihuha, ndhoka okwedhi popi esiku kwali taya ndhimbulukwa noku tyapula esiku lyaalongi, poombelwa onene dhe hangano ndyoka, oshiwike sha zi ko. Esiku lyaalongi okwali lya ndhimbulukiwa kohi yoshipalanyolo “Aalongi ye na ohokwe yependulepo lyelongo”.

“Aalongi oya ningi ethimbo taya si ondjala, omanga kehe shimwe otashi gwelwa. Nonando aalongi oya ningi ethimbo inaaya gwedhelwa natango oya tegelelwa ya kale yiitula mo moku gandja elongo, kaanona mboka yeli onakuyiwa yoshilongo shika,” ta popi ngaaka. Ta ti, aalongi otaya ningi omimvo heyali inaaya gwedhelwa onkene, itaya ka pitikwa nando ya kale inaaya gwedhelwa nando onopelesenta yimwe omumvo ta guya.

“Ondali ndayi momutumba na minista gwemona Ipumbu Shiimi, no ndali nde shi totha mo kutya aalongi oya pumbwa egwedhelo lyoondjambi, onkene naya kale ya kwatelwamo metengeneko thaneko lyoshimaliwa lyomumvo ta guya,” ta holola ngaaka. Ta ti, kape na eyipopilo kombinga yomukithi gwocorona aalongi naya ningilwe uuwanawa, ishewe nayo okwali ya ningi iihakanwa yomukithi ngoka.

“Otwa kundana omahooli goohauto taga gwedhelwa oshowo olusheno. Ngele ayihe mbyoka otayi gwendhelwa oshike tashi keelele oondjambbi dhaalongo oshowo ndhaanilonga yalwe kaandhigwelwe, omolwa anuwa omukithi gwoCovid-19,” ta pula.

Uuministeli wemona okwali wa yamukula kutya, etengenekothaneko ohali ningwa pamwe nomandiki gayooloka oshowo aakuluntu moombelewa onene dhomupilima gwoshilongo, onkene ayihe mbyoka oyi na oku enda momukalo guli ngaaka.

Omupopiliko mombelewa yomupilima gwoshilongo Saima Shaanika okwa ti, epangelo alushe ohali tula miilonga ontengeneko thaneko yokugwedhela oondjambi, ngele sha nyenyetwa komahango gaaniilonga ngoka geli paveta, moka aalongi nayo ya kwatelwa. 

-vkaapanda@nepc.com.na