Home / Aalongisikola yOokolegi Mekanka Aalongisikola yOokolegi Mekanka
WINDHOEK Aalongisikola yiiputudhilo yi nasha nokudheula aalongi oya dhike oonyala mevi nokutsikila noshipotha shawo okuza sho ya gandjele esiku lyahugunina kEpangelo etitano lya zi ko opo li yamukule komaindilo gawo. Aalongisikola mboka ya ya mekanka oyo mboka yookolegi dhelongo ne moshilongo. Osipana yOonkundathana nEpangelo oya gandjele etitano lya zi ko ongesiku lyahugunina kEpangelo, nokwa li ye ya tseyithile kombinga yoshipotha shoka. Aalongisikola otaya ti Ehangano lyAalongisikola moNamibia (Namibian National Teachers Union -Nantu) olya ndopa oku ya yelithila ngele aalongisikola mbaka naya tsikile noshipotha nenge aawe. 'Kutya nee otashi ka pula shike tse otatu ka ya komeho nekanka, aanambelewa ayehe yelongo oya tokola okuya meiteeko miilonga,' osho omupopiliko gwongundu Liswani Simasiku ta ti. Sho AmushangaNdjayi gwoNantu, Bassilius Haingura a pulwa a tye ko sha koshipotha shika, ina vula okugandja omauyelele, okwa ti ashike 'kape na okomenda yasha pethimbo ndika.' 'Oshinima shi nasha nookolegi itatu vulu okukomenda ko sha ngashingeyi, otwa tegelela natango eyamukulo okuza kOmbelewa yOmuprimaminista. Otatu vulu ashike okukomenda nawa ngele Ombelewa yOmuprimaminista oya tseyitha yoyene ngele otayi ki iyutha komaindilo getu nenge aawe,' osho Haingura ta ti. 'Mbuka owo uupyakadhi tu na noNantu, otashi vulika pe na ngoka ta ningile mukwawo uuwanawa wontumba mpaka, okukala inaa hala okuninga ekanka,' osho omulongi gumwe ta ti. Aalongisikola oye na eipulo kombinga yokumwena kwehangano lyawo lyaalongisikola - tashi vulika ehangano tali thiminikwa opo lyaa ye komeho nekanka, nonando pwa tulwa Etitano ongesiku lyahugunina. Kakele aanongeki ayehe oya dhika oonyala mevi kutya otaya ka ya komeho neiteeko miilonga, kutya nee ehangano lyawo olye shi zimina nenge aawe. Pethimbo lyoshigongi shaalongisikola mookollegi okwa li ya tokola otoko opo ya ninge ekanka. Omukwatelikomeho gOkangundu kEpangelo ke nasha noonkundathana, Amushanga Omukuluntu mOmbelewa yOmuprimaminista, Nangula Mbako, okwe shi koleke koshifo shika kutya okangundu koonkundathana pamwe noNantu oya kala nokulongela kumwe kombinga yoonkundathana okutala shoka tashi vulu okuningwa po naashika oshi li omukalo tagu yi komeho. Mbako okwa totha mo omaindilo gaalongisikola ngoka ga kwatela mo egwedhelo lyoondjambi ngoka ta ti otaga ungaungwa nago kokangundu koonkundathana hoka ke li kohi yombelewa yomuprimaminista. Kakele ota ti ye ina tseya esiku lyahugunina andola lya gandjwa kaalongisikola li kale Etitano lya zi ko. 'Ngame inandi tseya ombapila ndjoka.' Ota ti okangundu koonkundathana ota ka longo okutalulula omutengenekwathaneko gwiimaliwa ayihe yaaniilonga yEpangelo oshowo etsokumweuvathano ndyoka olye ya pehulilo, naandyoka epe opo tali kundathanwa nokutulwa miilonga moka omaindilo gaalongisikola taga ka ungaungwa nago. Okuza mOmaandaha, oshifo shika oshe shi pondola okushilipaleka kutya ookollegi ne ano ndjoka yaRundu, Ongwediva, Ovenduka noKatima Mulilo, kakele oye shi ulike kutya ekanka olyo ashike ompito yi li po shi nasha nomaupyakadhi gawo, ngoka taya ti oya kala nokupula okuza momumvo 2003. 'Ookollegi dhetu okuza kOngwediva noRundu otwa gongala notwa tsu kumwe tu ye komeho nekanka,' Simasiku ta ti.
Your experience on this site will be improved by allowing cookies.
