EPEMBE - Oosikola dhimwe moshikandjohogololo Epembe odha taalela uupyakadhi waalongwa ihaya thiki kootundi pethimbo omanga yamwe haya thiki ashike ethimbo lyokulya okatete.
Omutoolinkundana nguka okwa li a tsakaneke aalongwa yane, ethimbo lyo10h00 oshiwike shika ya thikama kondje yosikola.
Sho kwa li ya pulwaapulwa oya t, oya tidhwa mosikola oshoka oya laata kootundi, ihe nani kasha shi shoshili, oye ya ya tala ethimbo lyokulya etete.
Oomvula dha piti epangelo olya kala nokupalutha aanona poosikola, okupitila mopolohalama yiikulya, naashoka osha kala shi na oshizemo shi li hwepo okuyanda efaulo lyaanona osho wo ethigopo lyosikola kaanona mboka taya nana nondatu komagumbo omolwomaluhepo nokwaavula okulongekidhilwa okabaki kokosikola.
Omukuluntusikola posikola Hifikepunye Pohamba Combined, Petrus Shikongo okwa ti, ndjoka onkalo yakehe esiku.
“Mboka uupyakadhi wa taalela osikola yetu, aalongwa yamwe ohaye ya ashike ya tala ethimbo lyetete, ndyoka hali gandjwa kaalongwa ethimbo lyokafudho, na ngele yamwe ya mana okulya ohaya vulu okwiiyaka mo natango mosikola, omanga yamwe haya vulu okushuna moongulu,” ta popi ngaaka.
Ta ti, uupyakadhi ohau zi komagumbo omolwesiloshimpwiyu inaali gwana oshowo okwaau na uveko kwelongo.
Ta gwedha po ta ti, oyendji haya ningi ngaaka oya kambadhala okupopiwa nayo.
“Omweelo gwomuhandjo gosikola yetu ihagu pata, twa ningila aanona mboka haye ya laata opo ya pite uuna ya adha osikola ya hita. Shoka ohatu shi ningi netompelo lyaanona mboka haya ende iinano iile, ihaya vulu okuthika pethimbo, unene mboka ye li moongundu oonshona,” ta fatulula ngaaka.
Shikongo okwa ti, ohaya kumagidha aluhe aalongwa ya dhiginine osikola, oshowo okuthika pethimbo kosikola.
Shoka inashi taalela ashike osikola ndjoka, ihe oosikola odhindji moshikandjohogololo Epembe odha taalela uupyakadhi mbuka.
Omulongi gumwe ngoka edhina lye inaa hala lya tumbulwe okwa ti aalongwa yamwe ohaya pititha po omasiku kosikola inaaye ya ko pwaa na omatompelo gomongo.
Ta holola kutya aalongwa oyendji ohaya holoka ashike kosikola molwetete ndyoka hali hawalekwa posikola.
Okwa ti aalongwa oyendji ohaya li ashike iikulya yi na iitungithi uuna ya li etete posikola ethimbo lyokafudho kopokati kootundi, nohashi ya pe omukumo gwokutsila nootundi, ta ti aalongwa oyendji oya gwililwa po koluhepo.
“Oshitopolwa shetu osha gwililwa po koluhepo, niikulya mbyoka hayi hawalekwa poosikola ohayi kwathele okukaleka aalongwa mosikola, ngeno hamolwiikulya, ngeno aalongwa yamwe otaya thigi po osikola,” ta popi ngaaka.
Omulongi ngoka okwa ti osha simana aalongwa ya lye posikola.
“Nonande uunona wosikola ohawu telekelwa etete posikola, otatu kumagidha aakuluntu ya kale taya yambidhidha uunona nokabaki nokashona hoka shampa ngaa ya makela, oshoka uunona wumwe ohawu kala tawu kotha pethimbo lyootundi oshoka owa sa ondjala, shoka hashi etitha endopo lyokanona oshoka ihaka uvu mo sha motundi,” ta kumagidha ngaaka.
Omupeviminista muuministeli welongo Faustina Caley okwa ti, opo uupyakadhi mboka wu kandulwepo nenge wu hwepopale, aavali oya pumbwa okulongela kumwe naalongi.
“Aalongi naavali oya pumbwa okukala taya kundathana omaupyakadhi taga etitha onkalo ndjoka opo ya tale nkene tayi kandulwa po,” ta kumagidha ngaaka.
Aalongwa oya pumbwa wo okufatululilwa okuza kegumbo sigo okosikola esimano lyelongo, opo ya kale ye na ontseyo ya gwana kutya oshike taya hitile oosikola. vkaapanda@nepc.om.na