OKAHAO - Ominista yomayambulepo goondoolopa niitopolwa yokuushayi Erastus Uutoni okwa ta ti aayilongi oyendji ohaya hogolola uulongelwe wiinyangadhalwa yomoombelewa, oshoka oyendji oya landula iimpungu yoludhi ndoka kiiputundhilo yopombanda.

“Aanyasha taya zi moongundu dhahugunina natango kaye na onsteyo ya gwana yesimano lyiilongwa yopaungomba, mbyoka itaayi ya kalitha ethimbo ele momapandaanda konima yeilongo lyawo,” ta fatulula ngaaka.

Ta ti, aagundjuka oya tala unene kepangelo, ihe epangelo itali vulu okugandja iilonga kaantu ayehe.

Ta gwedha po ta ti, nonande epangelo olya li lya kondjo neitulemo okweeta iiputudhilo yopaungomba niilonga yokoonyala moshilongo opo ku humithwe komeho omayambulepo goshilongo mwa kwatelwa omahupilo, uulongelwe wiinyangandhalwa yomoombelewa owa ndhindhilikwa wu na aayilongi oyendji unene.

“Iilonga yuungomba oya pumbwa ku kuthwa kaanona taya thigi po oondondo dhahugunina, oshoka mboka taya kala ya pyokoka miilonga yuungomba otaya vulu okugandja iilonga kuyakwawo ye na oontseyo dhilwe.

 “Uuna ya mana omailongo gawo, nena otaya vulu okumona iilonga naashoka otashi vulu okushunitha pevi onkalo yokwaana iilonga moshilongo,” Uutoni ta ti ngaaka.

Ta gwedha po ta ti, oosikola ngaashi oo-VTC odho dhimwe dhomomalongo ngoka haga gandja oompito oombwaanwa kaayilongi, oshoka ohaya vulu okwiitotela iilonga yoyene uuna ya mana.

“Ngele otwa hala lela oshigwana sha putuka nena otu na okudhenga omuthindo mokuyambula po iipuntudhilo ngaashi oo-VTC nokukwashilipaleka kutya iiputudhilo yuungomba yilwe, niilonga yokoonyala otayi taamba aayilongi oyendji yi vule iiputudhilo yilwe,” ta kumagidha ngaaka.

Uutoni okwa ti oshilongo osha taalelwa kuupyakadhi waayilongi mboka ya mana omayilongo noye na uunongo wuulongelwe ashike otaya nyengwa okumona iilonga.

Minista okwa li a gandja oshiholelwa shiilongo yilwe mbyoka ya kala nokulandula oosikola dhopaungomba, opo oshilongo shika shi kuthe ko oshiholelwa.