Victoria kaapanda 

Aalongwa moshitopolwa shaHangwena oya ningi aanelago sho ya yambidhidhwa nuukwathithi waakiintu wu li 6 912. Uukwathithi waakiintu ohau dhana onkandangala monkalamwenyo yaakiintu, unene mboka kaaye na aakwathi oshowo iiyemo yoku wu landa.

Oyendji oya li ya thigi po oosikola omolwa iiningwanima hayi holoka mosikola uuna omukiintu inaa zala uukwathithi, uuna eli pethimbo ndyoka.

Ngoloneya gwoshitopolwa shaHangwena Walde Ndevashiya esiku ndyoka kwa li ta gandja uukwathithi mboka posikola Mwadikange Kaulinge Senior Secondary okwa ti, okumona omasiku, okuna omashongo ga yooloka no haku pula uuyugoki.

“Okwaana omeya ethimbo kehe nako otaku dhana onkandangala mokati kaakiintu naanona yaakiintu ya thika methimbo ndyoka, oshoka omeya ogena okulongithwa una omasiku ga holoka,” ta fatulula ngaaka.

Ndevashiya okwa ti, uukwathithi mboka okwa li wa gandjwa okuza koombelewa oonene dhomuPresinte okuyambindhindha aanona ye li mosikola.

“Okumona omasiku, oshitopolwa shuu kwatya wolutu lwaakiintu, uushitwe, nonando iilongo yimwe mwa kwatelwa Namibia, osha talika ko onga oshipwe,” ta popi ngaaka.

Ta ti, onkayi yuukwathithi mokati kaanona yosikola, ohaku eta omaupyakandhi ogendji oshowo okulundulula oonkalamwenyo dhawo una inaaya silwa oshimpwiyu.

“Uukwathithi ohau dhana onkandangala mokati kaanona yaakandhona, okuyanda okwaathiga po oosikola una sha holoka omanga ye li mootundi nenge mokati kaantu,” ta ti ngaka.

Ta kumagidha ta ti, egandjo lyuukwathithi nali kale onakolndjiigilile noku simanekwa, miitopolwa kashi shi ashike kondje yoshilongo. 

Esiku lyoWorld Menstrual Hygiene oha li ndhimbulukwa aluhe momasiku 28 gaMei okugandja omalongo nokuuvithako iigwana esimano lyomasiku oshowo omashongo haga adha aakiintu nenge aanona yosikola.

Omasiku omashona ga piti natango iitopolwa ngaashi Omaheke, Otjozondjupa, Erongo, Khomas oshowo Hardap okwali nayo ya yambnindhidha nuukwathithi wuli 864 kehe moshitopolwa okuza kehangano National Diagnostic Laboratory.

- vkaapanda@nepc.com.na