ETAKA - Aakalimo yomomundhingoloko gwoshitopolwa Omusati, unene mboka ye li popepi nEtaka oya tanga nkene ondama ndjoka tayi ya yambidhidha moompito odhindji.

Ondama ndjoka ohayi udhwa omeya okuza kOmahenene moka natango hamu zi omeya gu uka mokanaala.

Iitopolwa yomonooli ohayi aandjanekelwa omeya okuza koondama hoka.

Maria Samuel ngoka a li a adhika ta yogo iikutu pondama yEtaka komutoolinkundana gwoshifokundaneki shika okwa ti, omeya ohage ya yambidhidha noonkondo.

“Omeya oge na ondilo, unene kutse mboka katu na iiyemo yasha, oshowo mba katu na oopomba dhomeya, ohatu ya okulongitha omeya ngaka,” ta ti ngaaka.

Ta ti, omeya ohaye ga longitha ashike okukosha iikutu okwiikosha komalutu ihe ihaye ga nu nenge oku ga telekitha.

Otatu pandula oshoka ihatu keelelwa oku ga longitha. Sonia Shimpanda ngoka naye kwa li ta yogo iikutu ye esiku ndyoka okwa ti, otaya longitha omeya omanga ge li mo.

“Ohaga vulu okupwina mo, ee tage tu li omukaga. Onkene ngele ondama oyi na omeya, nena ohayi tu yambidhidha poompito odhindji,” ta popi ngaaka.

Omunafaalama gwiihulunde Petrus Ndeunyema okwa ti, uuna mEtaka mu na omeya nayo ohaya ningi aayamba.

Ta ti, iikunino ohayi longitha omeya ogendji, omeya ngoka taga zi moka ogo ashike taga vulu okukumwitha iihulunde yawo.

“Omeya gokopomba ohaga pula ondilo uuna tatu ga longitha. Ngashiingeyi otwa nyanyukwa oshoka omeya opo ge li,” ta ti ngaaka.

Omunafalama gumwe natango okwa indile ehangano lyoNamWater lyi kale aluhe tali kwashilipaleke kutya moondama omu na omeya opo kaaya hulile muunyengwi.

Ngoloneya gwoshitopolwa shaMusati Erginus Endjala okwa ti aakalimo  yomoshitopolwa she oyendji oyikolelalela muunafaalama.

Ta ti, opo ya hume komeho,oye na okukala  nomeya, opo ya tekele iikunino yawo oshowo okupalutha iimuna niikwamawawa yawo.

“Shoka osha gandja ompito yiilonga koyendji oshowo okukandula po ondjala moshitopolwa she,” ta popi ngaaka.

Endjala okwa ti omeya oga simana noonkondo moshitopolwa shawo. vkaapanda@nepc.com.na