OLUSHANDJA – Namwater oku li metifa lyokulongulula Etaka, nokutula mo opomba yomeya okuza mondama ndjoka yEtaka okufala kOponona monkambadhala yokuhupitha iimuna tayi dhengwa kongala. Iilonga mbika otayi ka kotha oomiliyona N$3, okuza kombelewa yOmupilima.

Okupomba omeya okuza mEtaka otaku ka kwathela aanamukunda miitopolwahogololo Oshana nOmusati mboka ya ninga oomvula taya longo nuudhigu okunwetha iimuna yawo pethimbo lyoshikukuta.

Omukuluntuwiliki gwoNamwater Abraham Nehemiah okwa ti itaya ka tula mo oopomba, nolusheno olwa tulwa mo nale.

Okwa ti ope na okangodhi kamwe kolusheno ka yakwa po kaakwashigwana. Ta ti oye ka tegelela ka thike nuuna ka thika omeya otaga ka pombelwa momuthima ngoka gwEtaka.

Ngoloneya gwoshitopolwa shaMusati Erginus Endjala okwa ti ngashiingeyi ope na oondama dhomeya 14 dha lambakana okanaala, ashike Etaka olyo ashike tali ka pombelwa omeya opo ku kwashilipalekwe kutya omeya otaga ka thika hoka ga nuninwa.

Endjala okwa ti omeya inaga dhindwa, onkene oga nuninwa ashike omiligu dhiimuna ndele hadhaantu. “Ngoka ta ka longitha omeya ngaka paumwene, otaya ka geelwa,” ta ti ngaaka.

Omeya oga li ga tulwa mokanaala lwahugunina momumvo 2015. Shigwedha okwa li a pula aakwashigwana ya indhindhimike oshoka omeya oga gwana okuthika kUuvudhiya.

Sam Shiino, omukwashigwana gwomomukunda Etaka mUukolonkadhi okwa ti okwa pandula sho epangelo lya tokola okupombela omeya mondama.

Shiino ta ti otaya ka kwathelwa.

“Ngele shika osha ningwa omumvo kehe, nena otashi ka kala oshiwanawa kutse aanafaalama, oshoka iimuna yetu otayi mono iihuna, ngashiingeyi ohatu yi nwetha nomeya gokoopomba,” Shiino ta ti ngaaka. 

vkaapanda@nepc.com.na