Oshizemo shoshikonga shokuyalula aantu moshilongo shoka sha li sha ningwa omumvo gwa yi, otashi ulike moNamibia ngashingeyi mu na aantu 3 022 401.
Omukuluntuwiliki mehangano lyoNamibia Statistics Agency (NSA) Alex Shimuafeni okwa ti nuumvo iizemo yomayalulo gaantu otayi ulike omwaalu gwa indjipala shi vulithe omimvo adhihe dha kala nokuyalulwa.
Omayalulo gaantu nomagumbo oga li ga tameke momasiku 18 gaSepetemba noga li ga hulu momasiku 03 gaNovomba omumvo gwa yi.
Shimuafeni okwa tseyitha kutya omayalulo gaantu gotango ngoka ga li ga ningwa sho oshilongo sha manguluka mo1991, aantu oya li ashike ya thikama poomilliona 1,4.
“Oshoka omayalulo ohaga ningwa konima yomimvo 10 aluhe, mo2001 aantu moNamibia oya li ye thike poomilliona 1,8,” ta totha mo ngaaka.
Ta ti, sho omimvo tadhi ende dhu uka komeho nomwaalu gwaantu otagu ende gu uka komeho, mo2011 aantu oya li ye thike poomilliona 2,1.
“Oshitopolwa shaKhomas osha ndhindhilikwa osho shi na omwaalu gwaantu oyendji, taku landula oshitopowa shaHangwena oshowo oshitopolwa shOmusati, omanga oshitopolwa shOmaheke sha ndhindhilikwa shi na aantu aashona kiitopolwa ayihe,’’ ta popi ngaaka.
Ta ti, aakiintu oya yalulwa ye na omwaalu gu li pombanda okuza omimvo adhihe ne, noopelesenta 51,2% omanga aalumentu ya thikama poopelesenta 48,8%.
“Omayalulo gaantu nomagumbo oga simana, oshoka ohaga ka longithwa okuthaneka elongekidho lyonakuyiwa, sha ikolela komwaalu gwaantu moshilongo, opo kehe gumwe a kale a kwatelwa mo,’’ ta fatulula ngaaka.
Ta ti, nonando ya kala nokutseyithilwa omashongo ga yooloka pethimbo lyomayalulo, omayalulo oga li ga ende nawa sigo opehulilo.
Ta gwedha po kutya inaya tsakaneka nando omaimbo ngoka ga li taga vulu okushunitha omayalulo monima.
“Shoka sha li sha halika omwaalu gwaantu, opo ku longekidhwe onakuyiwa ya opalela omwaalu gwaantu ayehe ye li moshilongo,” ta fatulula ngaaka.
Okwa li a pandula epangelo sho lyayambindhindha NSA noshimaliwa okulongekekidha omayalulo moshilongo.
Natango okwali wo a pandula omandiki nomahangano oshowo uuministeli wa yooloka sho wa li wa longele kumwe no-NSA.–vkaapanda@nepc.com.na