ONDANGWA - Elelo lyondoolopa lyOndangwa onkene tali tsikile okulongela aakalimo yawo omauwanawa, ngashiingeyi olya gandja natango omahala 64 kehangano lyokutunga omagumbo lyoNational Housing Enterprise (NHE).
Omugandji gomauyelele melelo lyondoolopa lyOndangwa Petrina Shitalangaho-Mutikisha okwa ti, omahala ngoka oga gwedha komagumbo ngoka ge li 24 ga gandjwa mEtiyali lyoshiwike shika kehangano olyo tuu ndyoka lyo-NHE.
“Omahala ngoka twa gandja 64 oge li koExtention 25. Elelo lyondoolopa lyOndangwa olya kuthako oongaku opo lyi itule mo mokugandja omalukalwa kaakalimo yawo,” ta popi ngaaka. Ta gwedha ko ta ti, methimbo lyoomvula ndatu, elelo olya li lya longekidha omahala ge li 321 koExtention 24, ngoka paife ga tungwa omagumbo.
Omanga koExtention 26, ngashiingeyi otaku tungwa omagumbo ge li 235. KoExtention 25 hoka kwa tseyika nawa kOndiiyala okwa longekidhwa omahala 348. “Olukanda Onantsi hoka kwa kala ku na omahala ge li 524, ngashiingeyi okwa gwedhelwa omahala 220.
Oproyeka yokutunga omagumbo Shack Dweller Federation (SDF), oyi li metifa okutunga omagumbo 37 kolukanda Omashaka,” ta popi ngaaka. Ta ti, kOmashaka natango otaku longekidhwa omahala 350, gaantu ye na iiyemo yi li pevi lela. Oproyeka Build Together otayi tungu omagumbo 24.
“Elelo lyondoolopa olyi li moonkundathana noDevelopment Workshop Namibia (DWD), nkene ye na okunengeneka oondando dhomagumbo,” ta fatulula ngaaka. Elelo olyi li tali tula Onguta oshowo Uupopo pamuthika gondoolopa, onkene aakalimo yokomalukanda hoka itaya vulu okupewa natango uumwene wevi. Minista gomayambulepo goondolopa nokuushayi Erastus Uutoni sho a li a patulula omagumbo ge li 24 Etiyali, kohi yoproyeka tayi ithanwa NHE, okwa ti elalakano lyokutungila aakwashigwana omagumbo kalyi shi ashike eyambulepo nehumokomeho lyoshilongo, ihe olyokuuvitha wo nawa nokukaleka po uundjolowele waakwashigwana.
Ooprograma ndhoka dhokutunga omagumbo odha li dha tothwa mo nelalakano okukandula po omikundu dhaamboka kaaye na omagumbo.
“Elelo lyoNdoolopa lyaNdangwa olya longa oshilonga oshinene noshiwanawa, otandi pandula aakomeho ayehe yondoolopa sho ya li ya longele kumwe, okukandula po ompumbwe onene nelunduluko moonkalamwenyo dhoyendji ya mona omagumbo ,” Uutoni ta ti ngaaka.
Ta indile natango ooyene yomikunda moshilongo ya kwathele omalelo goondoolopa okugandja omahala mpoka tapu vulu okutungwa omagumbo natango.
vkaapanda@nepc.com.na