OSHAKATI - Ethimbo lyaDesemba aanyasha oyendji ohaya kala ya hala okuulika shoka ya longo momukokomoko gwomumvo, ihe okwa ndhindhilikwa haye shi ulike momukalo inaagu uka. 

Anuwa oyendji ohaya dhanene iimaliwa miikolitha, okutalela po omahala gwokokule oshowo okulanda iinima inaaye yi pumbwa, nelalakano okuulika kutya oye na oshimaliwa. 

Aanyasha yamwe mOshakati oya kumagidha yakwawo ya ilonge okulongitha oshimaliwa shawo nawa okuyanda omaupyakadhi goshimaliwa petameko lyomvula. 

Oyendji ohaya kala ya taalela uupyakadhi woshimaliwa petameko lyomvula omolwokwaakwata nawa oshimaliwa ethimbo lyokili. 

Aanyasha ya yooloka yomOshakati oya li wo ya gandja omatompelo nomakumagidho gawo nkene oshigwana shi na okukwata oshimaliwa shasho pethimbo lyaDesemba. 

Saima Shikongo omuniilonga mositola yoohi, okwa popi ta ti ohashi vulu okukala oshidhigu okuteta omusholondondo gwaashoka wa hala, omolwoshimaliwa shoka omuntu a mono pethimbo ndyoka lyaDesemba. 

“Iilonga oyindji ohayi gandja oshimaliwa sha gwedhwa po kombanda yondjambi ndjoka yokomwedhi haya mono shito,” ta ti ngaaka. 

Ta ti shoka ohashi ya tula moondjo, oshoka ohaya ka iyadha kaaye na oshimaliwa shokushuna kiitopolwa hoka haya kala oshowo kaaye na iikulya momagumbo. 

Ta gwedha po ta ti, onkalo ndjoka ohayi thindile oyendji moondjo, nonando tayi vulu okuyandwa kuyele. 

“Nonando ethimbo ndyoka lyokili olya talika ko ongethimbo lyokugandja, oshigwana nashi ilonge okukwata nawa iimaliwa, nokwiihupithila po,” ta kumagidha ngaaka. 

Ta ti, ethimbo ndyoka lyaJanuali olyo hali kala aanona taya yi koosikola oshowo yamwe yu uka kiiputudhilo yopombanda ya yooloka. 

Samuel Shinedima omuhingi gotekisa ngoka ha hingile pokati kOndangwa nOshakati okwa ti onkalo ndjoka oyi na okukala ya longa oyendji omikalo, noye na okukala ya dhimbulula kutya okulongitha oshimaliwa kwa pitilila ohaku ya etele uupyakadhi petameko lyomumvo. 

“Otu na omanyanyu haga pitilile, sigo twa ka longitha oshimaliwa kiinima kaayi na oshilonga, netompelo anuwa, oDesemba,” ta ti ngaaka. 

Shinedima ta ti, oshimaliwa shoka owe shi gongela omvula ayihe, ihe oto shi longitha muule womasiku omashona, to shi longitha miinima yowala. 

“ O k u l o n g i t h a o s h i m a l i w a , okwiinyanyudha kaku na uupyakadhi, ihe okulongitha oshimaliwa sha pitilila ngaashi momalovu osho hashi eta uupyakadhi,” ta ti ngaaka. 

Festus Alweendo, omunambelewa gomayalulo giiniwe okwa kumagidha nkene oshigwana shi na okulongitha oshimaliwa nawa pethimbo ndika. 

“Okutalelapo omahala ga yooloka naakwanezimo oshinima oshiwanawa, ihe natango okukala momagumbo nokutyapula okili pamwe naakwanezimo oku li nawa shi vulithe oku ka futa omahala oshowo okulanda iikulya yopokathimbo,” ta kumagidha ngaaka. 

“Shoka osha ikolelela kaantu kutya otaya longitha ngiini oshimaliwa opo ya ka talele po omahala gamwe, taya vulu okwiihupithila po oshimaliwa shoku ya yambidhidha komeho,” ta ti ngaaka. 

Saima Ndikwetepo ngoka ha landitha uukuki komeho goNambango mOshakati, okwa ti Desemba ke shi ehulilo lyuuyuni. 

“Oyendji oya tala ko omwedhi ngoka gwa fa inaagu fa oomwedhi oonkwawo, ihe kape na eyooloko. Aguste nago omwedhi gwefudho, ihe aantu ihaya zi mo yena omaupyakadhi ga fa gomuDesemba,” ta popi ngaaka. 

Ta kumagidha ta ti, oshimaliwa nashi longithwe shoka shi na okulongithwa, ihe hakehe shoka to mono she ya komeho goye oshoka anuwa omwenyo nagu pewe shoka tagu pula, pethimbo lyokili. 

vkaapanda@nepc.com.na