OSHAKATI-Elelo lyondoolopa yaShakati otali kumagidha aakalimo yawo opo yafute oondjo dhomeya gawo, okuyanda eteteko lyomeya.
Omugandji gomauyelele melelo lyondoolopa yaShakati Katarina Kamari okwa ti, oya ndhindhilike kutya oondjo odhindji odhi li kaanangeshefa oshowo komahangano ga yama kepengelo.
“Otandi pandula oshigwana otashi kondjitha, unene aakulupe ohaya futu omeya gawo nonando haayehe, ohaya kambadhala. Uupyakadhi owu li maanangeshefa,” ta popi ngaaka.
Ta kumagidha ta ti, aakalimo naya fute elongitho lyomeya noshowo oondjogawo dhoka dhi li konima, okukelela omeya gawo ga ye moondjo ndhoka itaya ka vula oku futa, go taga tetwe ko.
“Otatu kondjitha elelo lyondoolopa kaali ye moondjo, oshoka ngele olya kala noondjo odhindji omeya mondoolopa otaga tetwa ko kuNamwater, shoka tashi ka tula ondoolopa ayihe muupyakandhi,” ta popi ngaaka.
Kamari okwa ti, aakalimo naya futile omayakulo gawo, naya kale yena esiloshimpwiyu lyokufuta omayakulo gawo.
“Ngaaka oshafa ta tu, gandja omeya oshali shamuhongi omanga hatu galanda,” ta ti ngaaka.
Kamari okwa ti, omeya oga ningwa ombiliha opo ga vulike ku kehe gumwe okufutwa.
Okwa totha mo kutya oondjo adhihe kumwe dhomeya sigo ompaka odha thikama poomilliona dhontumba, ihe ina vula okudhipopya kondanda lunde oshoka, ka kwali ena omwaalu ngoka ethimbo ndyoka.
Ta gwedhapo ta ti, omeya oga simana, onkalo yomuntu kee na meya kayili mondjila yo kayi shi ombwaanawa, shoka ta ti inaaye shi halela nando omuntu.
“Kehe ngoka itaaka gwanitha po eindilo ndyoka, elelo lyondoolopa otali ka kutha onkatu ya hugunina, yoku teta ko omeya,” ta popi ngaaka.
Ta ti, shoka okwa li yeshi eta po konima ya dhidhilike kutya aantu oyendji oye na oondjo dhomeya.
“Aantu inaya hala okufuta omeya, netompelo kaatu li shi. Otwa ningi ethimbo ta tu tseyithile noku kumagidha aakalimo yafute omeya gawo, ihe yamwe natango oya mwena,” Kamari ta ti ngaaka.
Ta gwedha po ta ti, mboka itaaya vulu okufuta pethimbo limwe, omolwa oondjo odhindji otaya ka pewa ompito yokufuta, ashike oye na tango oku shaina nkene taya ka futa oondjo dhoka.
“Ngoka a hala okutula po etso kumwe nelelo lyondoolopa kutya otaka futa oondjo dhe dhomeya ngiini, nomuule wethimbo li thike peni, na thike poombelewa dhelelo lyondoolopa, ya tule po omauvathano,” ta kumagidha ngaaka.
vkaapanda@nepc.com.na