OSHAKATI - Aalandithi yomomapandaanda oya ti oongeshefa dhawo odha kala nokushongola omolwombepo ndjoka ya kala nokupepa oshowo uutalala owindji wa kala ko okuza Omaandaha.

Oyendji oya nyenyeta kutya omahala gawo gokulandithila oga kala nokupepwa, shoka sha etitha natango ombepo yi nigilike iilandithomwa yawo.

Oya popi kutya onkalo ndjoka oya shunitha oongeshefa dhawo monina oshoka aantu itaya hala okulanda iikulya nenge iihulunde ya ningilwa ontsi.

Willika Kapiye gwokolukanda Oneshila ngoka ha landitha iihulunde komeho gositola Woerman Brock mOshakati okwa ti, ongeshefa oya shuna monima unene okuza nkene epepo lya tamekele Omaandaha.

“Okwa li ngaa hatu zimbuka nokathilinga taka vulu okufaalela omboloto kegumbo, ihe okuza esiku ombepo ya tamekele ookasitoma itadhi ende we,” ta ti ngaaka.

Ta ti, ookasitoma dhakehe siku inadhi pita mo momagumbo omolwuutalala nombepo ondhigu.

Kapiye okwa ti nonando ina mona we okathilinga ka gwana, okwa li a thiminikwa oku ka landa uupaala wa kola opo kaawu pepwe po kombepo.

Ta popi ta ti ota tala ngaa ngele uutalala tau shuna pevi nombepo yi hule opo ya tsikile okulanditha.

Maria Shigwedha ngoka naye ha landitha iihulunde okwa ti ombepo oya hanagula po okatala ke esiku lyotango ya tameke. “Shoka osha li sha sholitha ndje opo kaandi landithe esiku lya landula ko oshoka natango ombepo okwa li ya tsikile,” ta holola ngaaka.

Ta ti, okwa kanitha iihulunde yongushu N$350 sho ya pepwa ko kombepo esiku lyotango ndyoka kwa li Omaandaha. 

Shigwedha okwa ti ota shuna ashike uuna ya ti po hwepo.

Omulandithi gokapana Silka Petrus okwa ti ookasitoma nadho odha yi nombepo mbela.

“Itandi dhi pe ombedhi oshoka kape na omuntu ta hala okulanda iikulya yi li kohi yontsi. Shoka oshe tu tula manga mefudho,” ta popi ngaaka. Ta gwedha po kutya uupyakadhi owo mboka kutya osikola otayi tameke moshiwike tashi ya, nongele inaya adhika noshimaliwa shoka hashi zi mokapana,nena aanona otaya yi koosikola nondjala.

Ta ti shika otashi ka thiminika wo natango yamwe ya kale momagumbo oshoka kape na oshithilinga. Ombepo ndjoka ya ningi omasiku tayi pepe unene moshilongo okwa li ya etitha wo natango iiponga yomoondjila.

Opolisi oya kala nokukumagidha aahingi yoohauto ya hinge nuukeka omolwonkalo yombepo.